Fundman睇市：新奧債價回升露玄機

歐盟非正式峰會，睇死難有消災解困政策出台。希臘打爛仔交，港股同面書（facebook）一樣變成好友噩夢。周三，恒指跌252點，收18,786點，下周三結算的五月份期指，插到18,586點先肯停，比除息後合理值18,712點低水126點，反映基金認定持好倉過夜乃危險動作，紛紛透過沽期指為股份進行套戥。而且，沽空佔大市成交比例，由9.68%升至14.67%，創出N年新高。

淡友成為市場大多數，據以往經驗，隨時有挾淡倉可能，不過今朝滙豐會公布五月份中國製造業PMI指數，由近期極弱數據，以及五月至今得幾百億人仔的內地新增貸款數字，坊間估PMI會凶多吉少，就算想撈底，都要等埋十點半數據，睇清形勢至算。

日日有基金愛股出事，寶姿（00589）後輪到上海醫藥（02607）。內地傳媒報道公司被證監會及聯交所調查，股價最多跌三成六，午後跌幅收窄到兩成四，跌2.93元，收報9.11元，同一年前招股價23元比較，輾轉潛水六成。睇番港交所（00388）披露易，淡馬錫仲揸住上海醫藥16.19%，來自美國馬利蘭州傳統基金T.Rowe Price揸10.95%，摩通揸10.06%，大摩揸8.14%，就連社保基金都中招揸9.12%，五個大孖沙揸住街貨五成四，證明了兩件事，股市草木皆兵下，在避險上，大孖沙絕對唔會比散戶有優勢（咁大手貨想沽都無人接也！），二，國企唔見得比民企安全得多，試問今日何處是樂土？

中國燃氣（00384）昨日開市見9.74億元大手上板，最後成交9.96億，估計同幾個股東轉倉有關。自從中石化（00386）夥拍新奧（02688）以每股3.5元提出全面收購之後，中燃幾個主要股東，高調地耍太極兼嫌出價太低，中燃股價一度炒到上4.11元，直到近日股市轉弱才跌番到3.76元水平。

收到賓架界消息，話市況唔就加上索價太高，新奧有意打退堂鼓，消息當然未經證實，不過一葉知秋，筆者一直介紹趁低撈貨的新奧公司債，由年初低位88至92水平，矮仔上樓梯上番去98至99水平，相比提出收購以及被評級機構降級前的103水平，已還原基本步。照常理，只有兩個可能，一，債商睇新奧收購可以唔使加價下成交，仲會係發股唔發債取得融資；二，交易告吹，新奧債務評級有機會重返提出收購前水平，且看最後結局係邊個。

嘟QR碼睇行情

史提芬又有好介紹，為向讀者提供更多優質服務，《太陽財經》已將部分股市行情版資訊放到手機版網頁上，讀者可用智能手機的閱讀QR編碼應用程式，掃描刊於行情表內的QR編碼，快速進入相關網頁，瀏覽包括派息備忘、沽空紀錄、大手成交等行情資訊，讀者更可掃描在史提芬專欄內的QR編碼，查閱港股二十大升跌及成交的即市資訊，緊貼市場脈搏。