投資SUN國度：炒期指勝在夠瀟灑
無論做好做淡，一向都較喜歡以個股作為攻擊目標，如前日便是騰訊（00700）Call加港交所（00388）Put，不過以近期的經驗，索性簡簡單單炒期指，效果反而會好得多，問題不在選股能力，而是在於心理。出事的案例，一定是揀股票買那一邊。精挑細選某隻股票，當大市跌，手上股票頂得好，甚至有得升，很多時候的心態是待稍後氣氛好轉，豈不是升得更勁？可惜近期情況往往是事與願違，今日頂得好，過兩日可能某個買家已經夠貨收了手，不如先沽為敬，強勢股反而經常性追跌。
炒期指或做淡個股，就不會有上述貪心致敗的慘況。期指出入遠比股票容易，心理上平倉後可隨時追番，但以現今市況，大手買賣股票相當困難，一買一賣都要相當審慎，因而炒期指便遠比炒股票瀟灑，因為挾淡倉是從來不用講理由，所以淡倉永遠肯食胡。
