樓市出更：商戶鬥到內街舖租飛天

近幾年國際品牌以「銀彈」搶租尖沙咀廣東道唔少地舖，呎租起碼兩千元，加上盤少，所以依家焦點轉咗去隔籬嘅海防道、樂道及漢口道一帶，帶挈地舖租金倍升。就以樂道及漢口道一帶為例，目前呎租已經升到大約700至1,200元，有代理同劉Sir講，樂道有個單號地舖啱啱畀特色食店睇中，以每月約40萬元預租，呎租約1,000元，較現租金升咗三倍。

喺尖沙咀廣東道等揸住唔少舖收租嘅投資者梁紹鴻話，依家廣東道地舖租金算係幾高，短時間內租金再倍升唔容易，反而唔少大型金飾錶行都將分店選址轉去附近嘅海防道、漢口道及樂道，因而刺激舖位租金飆升，相信升勢將會持續。

海防道舖租年升一倍

事實上，目前尖沙咀廣東道一段嘅地舖，有啲呎租差唔多3,000元，絕不比銅鑼灣羅素街遜色，目前該地段平均呎租已升至約2,000元水平，一年間升幅逾一倍。不過，該等高消費地段商戶承租意欲持續高漲，但供不應求下，唔少商戶都將選址焦點轉移至海防道，依家海防道地舖呎租大約1,000至1,800多元，一年間升幅亦達一倍。

名店搶贏漢口道地舖

除此之外，尖沙咀國際廣場開業之後，樂道近年人流亦明顯增加，部分商戶都願意付出較高租金搶租心儀舖位，有市場人士話，一個依家租用海防道地舖嘅特色食店，睇好樂道後市，早前承租樂道一個單號地舖，月租要40萬元，較該舖原先月租約10萬元，租金大幅高咗三倍，以面積約400方呎計，呎租約1,000元，係理想水平。

近年漢口道唔少租戶係國際時裝及跨國體育用品店，吸引唔少商戶進駐，當中以介乎海防道與北京道一段漢口道，租務交投較突出。

消息話漢口道一個面積約1,200方呎雙號地舖，原先由本地時裝承租多年，早排獲一個歐洲時裝品牌用50多萬元搶先預租，呎租約420元，較現有租金高約一倍。