魚缸Blogger:東航下站目標2.7元
雖然港股尋日大致回穩,但成交得420億元,指標作用唔大。收市後有報道指英國步入技術性衰退,睇嚟歐洲離經濟復甦已經愈行愈遠,魚缸惟有寄望伯老推QE3打救一下。
近排多隻中資股發盈警,搞到股份一個月內動輒跌幾成以上,不過多隻急跌股中不乏優質股,睇位博反彈仍然有得諗。
以上海為基地嘅東航(00670),雖然已發首季盈警,但期內總載運量仍錄得升幅,而集團早前亦宣布同上海鐵路局合作搞「空鐵聯運」,加上憧憬能夠好似國航(00753)咁獲阿爺注資,尋日剛重返20日線嘅東航應有力再上,下站先睇2.7元。