樓市出更：商廈谷租口硬手鬆

近排港島寫字樓租賃市場氣氛麻麻，有代理爆料，唔少中區寫字樓業主表面叫租好似好硬淨，實際上免租期可傾多一、兩個月，變相減租，部分更直接加佣至兩個月谷盤，同時，亦有企業縮皮，一間原租用金鐘力寶中心2座嘅會計師行，轉租中環永安集團大廈，租金較之前減約58%。

事實上，近排唔少金融機構都話要慳錢縮皮，所以傾寫字樓租約時都要諗好耐。有代理話，唔少港島寫字樓業主都睇好後市，唔係好願意直接減租，不過，若然租客有誠意，想裝修個單位靚啲，業主都肯畀多少少免租期，一、兩個月免租期基本上無問題，如果個租客背景佳，三個月都唔難獲業主首肯。

睇番今年初，唔少機構趕住農曆新年前簽好寫字樓租約，業主只肯畀半個月免租期，依家市況明顯差咗好多。

中區租金看跌一成

另邊廂，有代理話，部分企業為減省成本，轉租中區面積較細及租金較低商廈。據悉，中環及金鐘約10幢甲級寫字樓中，金融及會計等相關行業租戶承租樓面比例，由近兩年前佔約70%，減少至現時佔近60%，仲有消息稱，一家原租用金鐘力寶中心2座嘅會計師行，轉租中環永安集團大廈，租金減少約58%。

高緯環球資料顯示，隨着環球經濟持續放緩，金融機構都積極縮減營運規模，香港甲級寫字樓租金難免受拖累，該行商務部高級董事霍佐平估計，中區租金今年底前再有5%至10%跌幅。

除咗以延長免租期吸客外，有部分業主亦直接加佣以鼓勵代理招租，個別都肯畀多額外半個月租金，作為獎賞，部分心急搵租客嘅業主，就以兩個月租金重賞。

事實係萊坊有份報告都話，歐洲債務危機未解決，故睇淡亞洲多國嘅寫字樓租金，香港同埋新加坡寫字樓開始出現租金壓力，不過內地唔少城市寫字樓租金就會逆市上升。

不過九龍區商廈就較好景，中原何淑貞話，由於起動九龍東效應下，觀塘靚景寫字樓租金可睇高一線，相信今年底前，高層海景單位呎租可挑戰40元水平。

而該行仲預期，九龍東商廈未來六個月租金有一成升幅，售價升幅最高有一成半，個別單位呎價可望1.4萬元。