股海實戰：中信証券可小注一試

港股繼續乾升，恒指挾上20,995點收市，期指更收喺21,000點樓上，可惜現貨成交僅471億元，咁嘅升市真係要打個折，但長期唔做嘢亦唔係辦法，惟有繼續睇輕指數升跌，至緊要炒嗰隻股票升就得﹗

受內地將就保險企業推境外投資新規嘅消息帶動，內險股全線做好，新華保險（01336）升5%、國壽（02628）及太保（02601）均升逾3%。論短線走勢，國壽同華保可以多加關注。此外，人行表示會適時用多種手段釋放流動性嘅言論，亦利好內銀股氣氛，工行（01398）及建行（00939）同升逾1%。

升市未獲成交配合

不過，尋日A股滬綜指現回吐，微跌收場。究竟大戶係咪借消息挾高，好方便累積更多空倉等半年結前後食大茶飯？綜合兩地形勢，阿莊直覺宏觀層面尚未具備股市大轉勢嘅條件，故奉勸各位，跟炒記得要控制注碼兼轉身快，特別係眨眼又已身處波幅區阻力位21,000點水平，且現貨成交明顯與升勢不配合。

國務院通過新能源汽車產業發展規劃，但龍頭環保汽車股比亞迪（01211）股價卻先升後跌，埋單唔見逾4%，好消息出貨格。兩隻電池股亦同一命運，超威（00951）及天能（00819）均跌半成。

海證掛牌料有刺激

另內地傳媒報道，未來內地或放開證券公司新設營業網點，並擬允許證券公司銷售更多種類金融產品。事實上，過去十年，內地金融政策向銀行業傾斜，未來金融改革嘅重點正係要提高非銀行金融機構（如證券行業）對實際經濟嘅支持，相信圍繞證券業新產品、新業務，以及資本管制放鬆等各個方面，將會有所突破。

據聞五月上旬，北京將召開一個券商創新業務大會，而本月廿七日海通證券（06837）會喺香港掛牌，即係話短線呢個板塊不乏消息。龍頭股中信証券（06030）周初回吐，至前日見15.48元現支持，尋日反彈至16.36元收市，公司於廿七日公布業績，年內股市不景，業績差係意料之內，但若然海證掛牌表現對辦，加埋圍繞金融改革出現利好消息，中信証券股價仍有望一試掛牌以來高位17.58元，回吐守穩16元可小注一試。

尋日推介嘅信義玻璃（00868）早段回試4.9元，見獲利沽壓唔大，之後一度抽高至5.05元，收報4.99元。阿莊以均價5.93元沽出短炒嘅中國南車（01766），再以均價4.95元換入6萬股信義。

Tip股我至Top

阿May（4/11）Tip

金威啤酒（00124）

最多升10%

徐燦傑（4/17）Tip

中國太保（02601）

最多升8%