Fundman睇市：工行有波幅無升幅

假期間傳出美國三月就業數據遜預期、內地通脹回升，加上早前西班牙拍債成績麻麻，歐豬債務危機隨着兩輪長期再融資操作（LTRO）威力退減後，死灰復燃。假期前揸重貨博港股復活節假期後「復活」的，今日或焦頭爛額。

美國三月非農業職位增加12萬份，遠差過預測中位數20.5萬。聯儲局主席伯南克早前提出，今次美國經濟復甦，就業市場表現相對滯後。華爾街當時把言論解讀成就業數字愈差，QE3推出可能性愈高，今趟數據堅差，到底好友會繼續炒高通脹下照推QE3？抑或令去年十月開始的升浪告一段落？

醒目資金棄股買債

上星期五美股休市，不過電子期貨跌1%，交投活躍得多的十年美債孳息，數據公布後急插至2.05厘，跌穿去年十二月到今年二月的2.1厘多次阻力位，同上個月高位2.4厘比較，調整幅度唔細，可見市場風險胃納正收縮，醒目錢明顯棄股買債。一不離二，中國三月份CPI比預期高，去到3.6%，進一步寬鬆貨幣政策或無望，中港股市今日沽壓不容忽視。

近期中外大行策略師都睇好內地今年經濟表現，樂觀者更估全年GDP增長去到9%，同中央放棄保八的預期大相逕庭。A股平均預期市盈率只得9.5倍，但平一定有平嘅理由，睇睇人民幣一年期不交收合約，兌美元由二月初低位6.2505，跌到昨日6.3343，比現貨價6.3086仲要低，意味一年後人仔唔係升值，而係貶值0.4%，同大家長期升值的共識有別。

要知人民幣不交收合約主要為貿易商對沖出口外匯風險之用，肯定較吹水專家貼市，故情況令人不安。今日內地公布三月貿易數字，到底首季出口增長放緩有幾嚴重，將可見端倪。

溫總提出內地大銀行壟斷的言論，引起內銀股一陣震盪。老實講，中國十一年前加入WTO，開放金融市場，今日外資搶咗四大銀行幾多生意？大家心照。四大國有銀行佔貸款市場份額八成以上，去年總利潤6,236億人仔，外資銀行至今仍只能停留在細眉細眼小額入股，以至極有限度分行經營的階段。

四大行有幾巨？舉例，一○年美國GDP係14.6萬億美元，四間最大銀行摩通及花旗等總市值5,480億美元，約等於GDP3.75%，而史上成熟市場的比率則介乎3至5%；反觀中國一○年GDP5.93萬億美元，大約係美國四成，即使近年股價麻麻，四大行市值仍高達6,900億美元，相當於GDP嘅11.6%。數字顯示四大行相對經濟規模來說偏大，說是壟斷一點不過分。

隨着內地金融改革的推進，大型銀行高利潤的好日子仲有幾耐？溫總言論是試水溫，抑或有決心向四大行開第一槍？筆者認為兩個可能性都存在。股市是最聰明投票機械，○七年初第一大行工行（01398）股價已見5元，五年後股價有波動無升幅，市盈率由最高峰38倍跌到今日的6.9倍，正正道出市場對內銀股暴利時代隨時會告一段落，其實有晒心理準備。