股海實戰：大成生化強勢展現

大家都在等恒指調整，偏偏就每日升少少，搞到班淡友囉囉攣！尋日A股表現令人眼前一亮，滬、深主板成交超過2,100億人仔，滬綜指重上2,400點樓上收市，睇嚟內地股民對「微調」有一番憧憬。

事實上，近次下調存備率，將於本周五開始生效，雖然中央原意係針對中小企，但經驗所得，唔多唔少會流入股市短炒一轉。再睇番最新數據顯示，上周內地新增A股開戶數目達到18.7萬戶，按周增19%，乃自去年十月以來新高，A股醞釀新升浪，確有迹可尋。本周二阿莊推介中信証券（06030），本來諗住落番16元邊先進場，點知見尋日跌唔落，忍唔住手以均價16.6元買入4萬股。

西部概念股當炒

講番尋日港股，內房股強勢奪目，皆因翻炒上海房管局重申外地戶籍居民持長期居住證滿三年可購二套房嘅政策，但會唔會三、兩日後又被中央嚴辭打擊，就係另一回事。若然A股氣氛持續向好，有咩中資概念可捧？內銀、內房雖然係較直接跟A股走，但累升幅度唔細，轉打其他板塊主意，近日國務院批覆西部大開發「十二五」規劃，概念股西部水泥（02233）呢個月股價經已炒高近五成，可以掹車邊炒同一概念嘅，仲有中國龍工（03339）、四川成渝（00107）同重慶鋼鐵（01053）。

此外，尋日一隻異軍突起嘅股份，乃從事製銷玉米提煉產品嘅大成生化（00809），喺美資行花旗唱好，將其目標價由1.74元大幅上調至3.46元下，股價由1.8元抽到上全日高位2.14元收市，升幅18%，成交1.91億元。

上月，大成確曾發出盈喜，指去年首十一個月收益同比增約五成，預計去年度收益及盈利按年大幅增長，主要受惠所有下游產品的銷售量、平均售價及毛利率有所改善。受盈喜消息帶動，其股價由一月初1.6元水平，升至本月上旬高位1.97元後現回吐，本周初一度跌穿250日線，但交投縮減，反映實際沽壓不大。

昨日該股以大成交重上250日線，走勢明顯轉強。可唔可以見花旗嘅目標價，阿莊就唔敢睇得太高，只係計計數，現價一○年度市盈率十七倍，假設一一年度純利增五成，現價一一年度預測市盈率不到八倍，估值確具吸引力。短線回吐企穩2元樓上，要上番2.3至2.5元區域難度唔大，10日及250日線支持匯集喺1.88至1.9元。

Tip股我至Top

Sammi（2/21）Tip雅居樂地產（03383）最多升12%

志強（2/21）Tip勝利管道（01080）最多升10%