Fundman睇市：中移買定貨等收成

聖誕假期後復市，恒指跌110點，收18,518點，滬綜指由2,134點拗腰倒升去到2,170點收市，對港股的刺激似有還無，說穿了，港股主板成交跌到唔夠280億，見三年新低。中午約埋一班經紀朋友飯局敍一敍，講起一二年港股交易時段進一步延長，食飯時間再縮短半個鐘，期指開到晚上十一點收市，如果成交額仲係得400至600億，經紀行要增聘人手，都咪話唔百上加斤。

尋日傍晚執筆時，仲未見到意大利拍債結果，由彭博顯示，十年期意大利及西班牙國債，孳息回落21及23點子去到6.68厘及5.01厘，雖然股債市成交都幾淡靜，但暫時睇歐央行聖誕前開始以1厘無上限借錢畀歐洲商業銀行買豬債套息的行動，效果仲係幾正面，如果歐債息可以進一步回落，而滬綜指超賣後又搵到短期支持開始反彈，假期後的港股，未必需要睇得太淡。

豪特保健業績走樣

上市半個月的豪特保健（06880），半年業績已經走樣，截至今年九月底中期純利1,259.9萬，跌32.3%。期內營業額1.18億元，按年升18%。睇番招股文件，預測二○一二財政年度純利有5,080萬，按年勁升1.26倍，依家半年只達目標四分一左右，會唔會又係一隻上市第一年交唔到功課的新股？睇番豪特係米蘭站（01150）以來，超購最多的新股，達242倍，現在兩隻超購王，分別潛水19.7%及31.6%，再次證明超購倍數同公司質素無關，保薦行交行嘅審查工作，亦應該受投資者質疑。

唔知看官有冇留意，蘋果公司幾代iPhone的硬照廣告照片上，iPhone的時鐘顯示都係早上九點四十一分（9:41），史提芬感好奇，但在網絡上搵答案遍尋不獲，估計應該唔會係陰謀論者所指，向中移（00941）獻媚！事關中移這個全球最大流動通訊巨無霸，偏偏是少數未有iPhone發售的網絡商，而蘋果公司就TD網絡生產適用漫遊制式手機的傳聞已傳出多時，但卻一直未見成事。

今年十一月底，中移佔全國手機用戶三分之一，達6.4億戶。可是，其3G客戶佔用戶比例只有8%，3G滲透率遠低於中電信（00728）的37%及聯通（00762）的23%。以聯通為例，3G較2G的客戶消費，差不多高出三倍，故基金普遍視3G數據用戶，才是電訊商爭奪的高利潤群體，令到在3G起跑線上，受自行研發的TD制式拖慢的中移，股價今年累跌3.4%，相對聯通股價年內累積升48.3%，中電信亦有8.1%進帳。

儘管聯通近兩個月，在千元3G手機上策略十分成功，加上春節前後預期可獨家售賣iPhone4s，在3G上客優勢上，有機進一步保持甚至拋離，但以四十五至五十倍預期市盈率，相對中移的9.7倍，估值折讓亦應充分反映兩者的條件，尤其中移無負債，估計今年營運現金流入達2,500億元人民幣，即使四成三派息比率下，股息回報亦有4.4厘以上，除非中移一世都在3G發展處於被動，甚至永遠沒有適用的iPhone供應（當然這可能性近乎零），否則傻一次早點買來收息，閣下的損失，最多只是現在不太值錢的「機會成本」。