股海實戰：國藥繼續博反彈

港股尋日成交僅372億元，乃廿二個月新低，扣咗牛熊證及窩輪成交額合共120億元，即係話股票現貨成交只有252億元，難怪卜架同炒家都冇晒心機。恒指尋日企穩喺萬八點樓上，但期指就大低水101點收市，股海再現暗湧。

尋日復牌嘅漢登（00448），獲利豐（00494）母公司提出現金收購，每股作價2.7元，股價即升55%。博股份被私有化無疑係一條財路，但係好考耐性，阿莊三年前亦識得有股友買漢登博私有化，但等到變「長頸鹿」，舊年股價起飛前經已悶走，所以話，「各有前因莫羨人」，長揸股東等到今日真係抵佢賺錢！

兗煤走出去利估值

尋日另一單大嘢係兗煤（01171）停牌，傳聞洽購澳洲上市煤企，涉款20億美金，若然成事，再次成功走出去將有助拉升估值。同樣喺澳洲有投資嘅湖南有色（02626），尋日股價亦曾升逾一成。本月以來湖南有色母公司已三次入場增持，尋日股價升勢除咗受惠同業消息外，亦唔排除母公司再入場增持，短線回吐守穩2.2元水平尚有可為。

內地宣布上調可再生能源電價附加徵收標準，但相關股份未有異動。翻查資料，上一次提價喺○九年十一月，其後數月相關股份亦唔見有咩表現，更何況依家身處大淡市，班炒家鑑古知今唔做嘢，看官亦無謂多作遐想！

論大價股，尋日見國藥（01099）有反彈，高位見18.26元，收報18.16元，升3.5%，成交5,184萬元，剛收復了10日及20日線。其股價喺八月低見16.7元，十一月下旬見過16.8元，前日低位則做17.16元，底部支持似正緩慢上移，而期間14日RSI現背馳，股價尚在築底階段。

再計估值，現價往績PE回落至28.8倍，今年首九個月純利增長三成至12.39億元人仔，保守估計一一年預測PE約二十三倍，估值已回落至相對合理嘅水平，惜大淡市股票估值要「超值」先有人吼。短線該股反彈阻力位喺50日線19.2元，16.7元乃上市以來低位，一旦失守，以預測PE十八至二十倍計，下一較大支持區介乎14至15.5元。