股海實戰：置富產業高息夠穩陣

阿爺翹埋雙手唔做嘢，外資同本地薑都急於沽貨套現應付年關，A股市場頓現人踩人場面，重磅股成提款機，中國人壽A股（601628）急挫逾8.89%，跌幅遠高於H股（僅2.6%），滬綜指14日RSI落到23，收報2,180點。股海潮漲潮退本是平常事，但當前潮退之急卻真的叫人畏懼！

滙豐版的中國製造業PMI指數，十二月初值為49，雖為兩個月高位，卻仍處於盛衰分界線之下。隨着出口增長放慢、內房調控持續、通脹壓力紓緩，中央推出措施保經濟促就業只係時間問題，但政策市一向難捉摸，唔想博都係收爐冬眠最實際！

資源股全面受壓

喺內地經濟前景展望未明之下，能源及資源價格受壓，相關股份亦集體跳水，中石油（00857）同中海油（00883）股價跌3%及4.5%；兗煤（01171）及中煤（01898）分別跌5.7%及3%；招金（01818）、中國黃金（02099）及紫金（02899）跌幅介乎3.8至8%。

令阿莊感詫異嘅係，就連一向股價升市跌、跌市升嘅中移（00941），尋日都未能幸免，收報73.35元，跌2.2%，成交18.4億元，唔排除同A股一樣，有長錢持續流出港股。

至於兩隻大型新股周大福（01929）同新華保險（01336），一如所料做咗巨型「潛艇」，多手入飛抽獎又要交低唔少學費，睇怕今日掛牌嘅華保A股亦「瓜多過菜」﹗

內地商務部表示，家電「以舊換新」措施已達到預期效果，將於本月底結束，不獲延期，家電股頓失國策依靠，創維（00751）及海爾（01169）同跌逾6%，國美（00493）亦跌逾3%。反觀內房股潤地（01109）同中國海外（00688）均升逾1%、世茂（00813）升逾4%，主要係有消息指時近年尾，內銀略為下調咗首套房貸息率，消息是否屬實尚未可知，刺激作用可維持多久亦成疑問。

領匯迭創新高位

仍停留喺魚缸嘅資金，多數停泊喺穩陣嘅高息股避險，故見近期領匯（00823）股價迭創五十二周新高。同屬房地產信託基金，置富（00778）尋日亦升1.09%，收報3.7元。

置富嘅收租物業主要係多元化零售商場組合，今年第三季可分派收入1.12億元，同比升16%，表現符合預期，現價往績息率6.7厘，市帳率0.59倍，再參考圖表走勢，單位價格向上阻力喺3.8至4元，支持位喺3.5元。