老牌家族一炮過散貨

優質商舖及寫字樓向來投資價值高，而舊樓重建升值潛力亦非常驚人，劉Sir收到風，有老牌家族趁機要約形式一籃子放售8項優質投資物業，包括中環威靈頓公爵大廈地舖及寫字樓單位、何文田萬基大廈其中1層非住用樓面及42個車位，以及西九龍通洲大樓地舖及3個住宅單位，估計加埋售價逾2.4億元，截止要約日期為下月十二日。

近排樓市表現雖未如理想，不過二手住宅始終係政府着墨遏抑嘅對象，所以工商舖同埋具重建價值嘅舊樓市道其實未係咁差。

買家自由組合出價

劉Sir聽世邦魏理仕郭振昌講，上述8項多類型物業由同一業主持有，有意洽購買家可以按任何物業組合出價，估計整批物業總成交額將超過2.4億元。

今次一籃子以要約形式推出嘅多類型共8項物業，包括位處商業核心區威靈頓公爵大廈地下24號舖及8樓B室寫字樓、萬基大廈2樓全層現為護老院的非住用樓面、該廈4及5樓共42個車位、以及富有重建潛力嘅通洲大樓地下D號舖及3個樓上住宅單位，睇牌面呢批物業又真係幾吸引。

劉Sir透過土地註冊處資料，上述威靈頓公爵大廈地下24號舖由正興建築有限公司持有，翻查資料顯示，該公司於去年九至十月期間亦曾以約2.6億元以招標形式沽出一座西貢飛鵝山大屋，當時入標人士仲包括區內業主、財團以至發展商。

另一方面，政府銳意發展東九龍商業區，令到唔少資深投資者都伺機吸納區內物業。

投資者買太子滙舖

資深投資者「物流張」以約1.8億元購入太子道西太子滙地下舖位連1樓全層，總樓面共約21,073方呎。中原鍾浩文話，該物業現租予多家食肆及發展商作售樓處，月租收入共40.2萬元，租金回報率2.7厘。