短炒倉：青蛙王子 有力反彈
近排非常多人結婚，志強同朋友隨時因飲喜酒而一星期要見幾次面。據講話原來出年係龍年，因此唔少人都趕住結婚然後生龍仔龍女，早排里昂仲為此出報告，推介四大龍年BB股，分別係博士蛙（01698）、蒙牛（02319）、青蛙王子（01259）同恒安（01044）。
就算唔信龍B效應，但國家衞生部早就指出，內地出生率將在二○一六年達到頂峰，所以BB仔生意真係唔憂做。不過睇番四隻股份，恒安一向備受睇好，但估值亦因此長期高企；至於蒙牛，睇內地同胞都湧嚟香港買外國奶粉，受惠程度難免成疑；博士蛙則因早前的不利消息困擾，目前仍在深度潛泳。故四揀一的話，個人認為青蛙王子最可取。
講到潛水，無錯青蛙王子現價2.05元，較招股價2.6元仍然低兩成，但集團穩佔內地嬰幼兒護膚品市場第二位，僅次於美國強生，今年中期純利勁升逾七成，賺6,961萬元人民幣，由於下半年度屬旺季，其保薦人建銀就預計青蛙王子一一年度全年可賺2.09億元人民幣，現價預測市盈率僅8.2倍，尋日一舉升穿20日線，下一阻力睇上月高位2.3元，中線可博重返水面，支持位1.8元。
