Fundman睇市：中鋁具追落後價值

人行減存款準備金率的動作，唔能夠講係完全脫離市場預期，一葉知秋，由近期的出口數據，PMI跌穿50警戒線可見，中國經濟的放緩速度，比市場預期來得更快，但對於沽了期指，掃了熊證，或者剛剛來個歲晚清倉的股民而言，就或者會覺輸得唔抵，皆因人民銀行示範了完美的「推左走右」，同球壇最強的巴塞美斯相輝映，在不足十二小時之內，派出央行政策委員會會員夏斌，重申國家的定點微調，並不意味寬鬆措施來臨，掉轉頭，就宣布三年內第一次調低存款準備金率，揭開放鬆銀根的序幕，為營造意想不到的市場喜訊，假動作的演練可謂已出神入化，最可憐的夏斌，以後發言唔知仲有幾多人會信佢。

明年再減RRR機會高

美銀美林估計，一二年底前人行仲有三次，可能各50基點的調低存款準備金率機會。瑞銀指隨着官方的PMI數據跌穿50，估計十一月份通脹也會在4.5%樓下，定點微調，說穿了是放水先兆，該行大幅調低明年中國經濟增長預測，由9.2%降至8%，全年最壞的情況，會在第一季出現，受歐洲經濟及內地建築業放緩拖累，按季增長會放緩至6%。因應今次放水，該行調高全年新增貸款總額預測，由7.2萬億元提高至7.5萬億元人民幣，明年則達到8萬億元，以免經濟出現急煞車，並且預測明年人民幣會維持穩定升值，年底兌美元會觸及6算水平。

歐豬債息在六國聯手干預消息下回落，基金經理再一次「焗住」增加風險胃納，在十二月第一個交易日入市掃貨。前日先講過，過去四個月，恒指唔係大生就係大死，無論升跌都有近二千點變動，尋日一升就過千，唔通今個月見兩萬？

尋日恒指勁升1,012點，報19,002點，淡友靠邊站，因應阿爺放水受惠的板塊，好似資源、水泥及內房股挾得最燦爛，不過講到開心嘅，肯定係早兩日仲愁緊為近期幾隻新股上市的保薦行，唔少新股早前因市況唔好，定價頗低，大孖沙見咁抵買，據聞唔少同保薦行講話要添食，筆保薦費幾乎肯定袋袋平安也。

中資股尋日絕地反擊，除了內房、內險及內銀股之外，資源股亦有起色，就如內地鋁業龍頭中國鋁業（02600），昨日股價彈升8.19%，收報3.83元，成交2.7億元。在內地成本價格上漲但鋁價持續走弱的情況下，儘管中鋁今年第三季業績轉虧為盈，純利按年大增5.8倍至5.5億元（人民幣．下同），但公司管理層表示經營環境仍然嚴峻，多間大行更睇淡其前景。

事實上，近年電解鋁行業經營困難，但隨着行業生產規範化，改革最終結果必然係汰弱留強，中鋁這些龍頭股，可望成為行業淘汰賽嘅受益者。

雖然以PE比較，中鋁的估值遠高過另外兩巨頭力拓及美國鋁業，但以全球最大金屬資源消費國中國為基地的中鋁，一○年度的銷售增長卻是三者之冠，按年增幅達72.19%，加上內外基本因素改善，而中鋁今年股價又已累跌逾半，技術上亦出現三底不破的利好走勢，中短線而言，追落後的可塑性相當高。