魚缸Blogger：中升基本因素紮實
MSCI指數成分股變動今日生效前，尋日資金積極買貨，將總成交推高至780億元，但A股急挫3%，似乎預示今日內地公布嘅PMI數據凶多吉少，料恒指短期底部仍然未見。
同為MSCI新貴，但中升（00881）近半個月股價未有顯著上升。作為內地豪華汽車龍頭代理，今年上半年中升喺內地嘅4S店數目已超過正通（01728）同大昌行（01828）加埋嘅總和，加上內地豪華汽車市場並未受內外經濟困局影響，單計中升代理嘅奧迪，今年頭十個月喺內地嘅銷售已按年增長32%。
中升基本因素紮實，尋日成交就喺MSCI效應帶動下激增六倍，首站阻力先睇15蚊，支持喺13蚊。
