Fundman睇市：工行後市毋須睇淡

歐盟財長會議前夕，謠言滿天，前日傳國基會向意大利提供貸款，以及德國願意發統一債券，經已證明係流料，歐債危機新聞鑊鑊新鮮，真假難辨，相信不少股民睇到有點膩，但市場仲係相信明天會更好，周一大市反彈348點後，恒指昨再升218點，報18,256點，成交似模似樣，升至551億。

毫無疑問，醜婦終需見家翁，歐央行係時候拋出一個詳細陳述EFSF實際操作的方案，市場期望德國最低限度會聯袂另外五個仲有三條A信貸評級的歐盟兄弟，發精英債券援助其他財困國家，可惜德國民調顯示，六成以上德國人唔想政府咁做，只有一成半左右肯無私咁希望國家落重本解決歐豬危債，因此史提芬建議看官唔好抱太大期望，喺德國總理默克爾夫人心目中，到底係民意重要抑或「道義」重要？大家心裏有數。史提芬估計要危機升級到德國人都感到事態嚴重，民意轉向，默夫人先至會出手，到時會唔會太遲？無人知，但之前的每次股市氣氛逆轉，好大機會只係短暫迴光反照。

快餐股壓力漸浮現

進口食材通脹，加上最低工資，對快餐股的營運壓力開始浮現，大家樂（00341）及大快活（00052）中期業績，前者營業額雖然升10%，可是純利卻跌15%，賺1.9億，毛利率跌至11.77%，中期業績是○三年沙士以來首次回落。至於大快活，營業額升12.2%，純利跌17.6%至5,822萬元（扣除去年出售物業的一次性收益，實質微升5.7%），毛利率由15%降至13.7%。不再有特別息關係，大快活中期息減少21%至20仙，大家樂則維持17仙派息，相信是昨日股價一升一跌的主因，儘管食材價回落，大家樂看來不易達到全年4.93億的市場預測盈利（預期市盈率21.2倍），大快活的低估值，反而更合心水，10元附近可以諗吓。

昨日財險（02328）宣布抽水，成為首隻伸手供股集資的內險股。雖然今次財險集資額不算大，AH股兩地市場合共僅抽水50.02億元人民幣，但早前內地監管機構提高保險公司發次級債的門檻後，同業如國壽（02628）及平保（02318）已自顧不暇，行內第二梯隊新華人壽的新股招股活動更要瘦身上路，就算是大孖沙彤叔亦要趕搭尾車將千億寶貝周大福上市，更遑論處於水深火熱的外資大行了，有銀士除咗阿爺之外實在已經所餘無幾。

仲記得月中美銀大手減持建行（00939）的時候，除咗淡馬錫接貨外，中投旗下的匯金亦以每股接近4.94元接咗27.6億H股貨；再睇今年十月中A股跌至兩年半低位的時候，作為四大行大股東的匯金亦落場在二級市場購入工中建農A股股份，可見阿爺會在股份跌至低殘的時候伺機出手，所以就算出年股市可能是難捱的一年，看官亦唔使睇得太淡。

雖然工行（01398）今個月被高盛怒沽17.52億股，但貴為全球最賺錢銀行，工行今年首三季實現淨利潤按年增長逾28%至1,639億元人民幣，而中央經濟工作會議召開在即，屆時或會釋出宏調政策微調的訊號。工行現價往績市盈率僅約八倍、市帳率1.5倍，如守穩4至4.2元區間支持，中長線的投資價值將會浮現。