Fundman睇市：瑞聲值得密切留意

近期市場持續揣測，下個被評級機構睇中，短期可能被剔除AAA信貸評級的國家，大熱門乃係法國，尋日法國十年期國債孳息一度升穿3.7厘，同月初的2.95厘相比，可見歐債危機草木皆兵下，對任何利淡消息，悲觀的投資者有理無理都會揀信咗先。歐盟執委會主席巴羅佐指，歐元區面臨一場系統性危機，各國需要作更大承諾，加強合作方有機會解決面前的困局。

不過，十隻手指有長短，何況要十七個國家綁在一個共同貨幣及金融政策內？英國首相卡梅倫日前已向歐盟大潑冷水，公開表態對歐元前景存疑，芬蘭財長也直指歐元區國家互不信任，芬蘭也反對成立歐元共同債券。依家EFSF十畫只得兩三撇，未去到出資階段就已經口和心不和，歐債危機最後點收科？筆者都希望自己睇錯，可惜搵來搵去都無理相信，可以咁易將危機化於無形。

恒指試18435機會高

今日要喺港股搵食，真係要相當國際化，尋日大市基本上睇實意、法、西債息及CDS溢價做人，恒指開高135點，以19,483點開出後，全日浸浸落，最低18,768點，連50日線18,797點都一度失守，收市前夕，歐央行大手入市買入歐債，意息回到7厘危險線樓下，大市跌幅由最多579點，收窄到387點，由走勢睇，十月二十四日遺下的上升裂口18,435點，短期先來個回補的機會唔細。

MSCI香港指數多隻成分股變動，大行估計，以過去廿日平均成交，以及街外追隨MSCI指數基金估計需要補充的股份計，最受惠的包括達芙尼（00210），估計要買12.6日，遠東宏信（03360）11.3日，上海醫藥（02607）10.5日，高鑫（06808）9.2日及中升控股（00881）6.8日。

不過，筆者補充一句，追MSCI博補倉宜短不宜長，進身成分股雖然逼到唔少ETF追貨，可是ETF也是目前大市借貨沽空的主要來源，像估值高得離譜的高鑫，目前淡友很難借貨，成本也高，入MSCI後供應可能增加，小心炒完向上之後會掉轉頭炒落。

最近英國《每日郵報》把全球潮人熱捧的iPhone4s拆骨，計出賣499英鎊（約6,235港元）的4s，成本只係113英鎊（約1,412港元）。睇了工業股多年，成本同出廠價，一般有四至五倍距離好合理，主要係公眾一般忽略最大筆的推廣及銷售成本，蘋果公司唔算係特別刻薄用家，提出這單新聞，係睇到相機、天線兩個主要原件的成本，分別達10.98及18.75英鎊，差不多等於總成本四分一，吸引到筆者興趣。

本地上市的瑞聲科技（02018），眾所周知是iPhone4及4s的微型喇叭主要供應商，近幾年透過購併，開始涉足微型光學鏡頭及天線技術，如果報道無計錯，相機、天線兩個主要零部件單價，是遠高於電話微型喇叭，瑞聲與電訊設備商有良好客戶基礎，新業務發展潛力，看來有被低估之嫌，4s臨近年底才推出，或許令今年業績增長幅度低於一○年度，但明年應可樂觀，趁跌市可以做做功課，密切留意。