Fundman睇市：雨潤食品睇定啲再諗

昨日，睇住大利市機確係無話可說，20大升幅榜成交超過一千萬得隻晨訊（02000），其他通通屬於雞仔注「mark」高之流，期指除了開市半個鐘同收市半個鐘外，其餘時間幾乎同屋企雪櫃入面舊年食剩的半隻火雞一樣，又死又實。

俗語話出得嚟行遲早要還，今浪恒指由16,170點開始反彈，依次序炒高嘅包括內銀、內房、內需、資源、航運、鐵路到垃圾股，今次兩萬點久攻不破兼做個M形頂，同樣由內銀股牽頭，高盛以每股4.88元減持市值130億元的工行（01398），股價埋單插8.6%，收4.74元，接貨者即日要吃眼前虧。

高盛批工行快狠準

尋日飯局，有位基金界老友狂讚高盛，話今次保密工夫做到加零一，坊間只係不停傳美銀沽建行（00939），他身為客戶，也未聞高盛有要錢唔要貨的意向，時機掌握也屬一流。這位朋友仲話，工行股價近期升到八、九月高位阻力重重，前日收市，滙控（00005）季績唔多對辦，加埋意大利債息破7厘警戒線，兵兇戰危之下，90億貨可以貶吓眼賣晒，高盛的去貨渠道非一般外資行能媲美，難怪近年阿爺唔少大型融資，都鍾意搵高盛去牽頭。

工行批股，滙控業績PK，兩隻股票已經拖低恒指386點，收市跌1,050點，報18,963點，跌市成交不跌反升至749億元，沽空佔總成交比例由8.45%升至9.15%。技術上，恒指前日升唔穿100日線20,147點，掉轉頭即試50日線18,888點，短期CHOK得過分，不排除會先來一次技術反彈，可是今浪喺19,500至20,272點間，又綁咗唔少博反彈的資金，睇嚟後市先回試16,170至20,272點升浪的五成回吐，即18,221點的機會唔細。

雨潤（01068）曾經是筆者相當喜愛的股票，可是近年負面新聞不絕，包括針對大股東的其他投資，獲政府的巨額補貼，以及養豬場數目未達公司目標數字等等，有不少傳言是難以求證，可是經驗告訴我們，跟紅頂白的股市，往往一沉百踩，傳傳吓自然會有人信，惟有沽掉再作觀察。

尋日瑞銀加入唱淡行列，把雨潤評級連降兩級，由買入降至沽售，理由係屠宰業務在低產能使用率下，盈利表現或會惡化。這種今日的我打倒昨日的我嘅報告，風平浪靜時，好少分析員會認低威咁做，故極具參考價值，看公司是否有少數人才看得到的「隱疾」。不過，今時今日港股跌起來已經唔使講道理，唔少分析員變成被股價牽着鼻子走，見公司股價同目標價各行各路，愈走愈遠，焗住要跟大隊為淡而淡。

瑞銀報告估雨潤一一同一二年，盈利分別為15.98億和18.94億元，的確比坊間綜合預測數字24.91億及27.68億元為低，但以瑞銀數字計，現價11.94元，只係相當於11.5倍市盈率，即使一一年業績回落，但按該行預測，一二及一三年盈利會回升18.5同10.5%，計落估值都唔算貴，是否要跟建議沽貨，見仁見智。反而股價近兩個月，由7.45元反彈到14.88元，累積升幅唔細，而第四季業績，幾乎被一致睇淡，跌幅可能比第三季更大，想捧場不如睇多一兩季業績至諗。