股海實戰：觀望為上勿輕舉妄動

繼希臘搞出個公投風波後，又輪到意大利政局動盪，十年期債息飆至逾7厘嘅警戒線，歐、美魚缸前晚大散，港股亦跟住玩「笨豬跳」，恒指低開900幾點，喺19,100點水平行了大半天，午後失守萬九點關，最終收報18,963點，跌1,050點，成交增至749億元。

點解意國債息升穿7厘要咁驚，皆因之前希臘、葡萄牙同愛爾蘭都係因為國債孳息率升穿7厘後，難以支持舉債高息而被迫向外求援。若然意大利都要淪落都咁嘅地步，只怕遲早會燒到去兩個老大哥德國同法國身上！

意大利亂局手尾長

執筆時傳來意大利參議院將加快喺今日就債務縮減措施進行投票，之後會迅即交由眾議院審議，順利通過的話，總理貝老將立即辭職。之不過，貝老下台後，究竟係各黨組成過渡聯合政府，抑或提前舉行大選，尚未明朗，總之就係手尾長！依家有意見話設立退出歐元區機制，剝離「歐豬」毒瘤，又或者成立一個核心歐元區，以重建投資者信心。雖然呢啲都係可行嘅辦法，但當中涉及嘅步驟甚為繁複，需時冗長，恐怕遠水難救近火。

個股方面，大笨象（00005）季績遜預期，股價失守62元支持，收報61.7元，跌9.1%，相等於恒指跌282點，沽空額6.7億元。另一季績表現遜色嘅藍籌騰訊（00700），亦一度落過157.9元，收報159.4元，跌4.26%。

A股滬綜指尋日失守2,500點關，收報2,479點，跌45點。本港國企指數亦大跌逾半成，收報10,300點。被高盛配售股份嘅工行（01398），本來喺4.75元有一千個買盤守護，但午後血肉長城亦告失守，低位見4.71元，收報4.74元，跌8.67%。就連呢排一直走強嘅國壽（02628）都要跪低，收報21.75元，跌6%。睇嚟呢回除非阿爺出手打救，再度放鬆銀根，否則中資股要翻身，真係阻力重重。

牛證再成屠宰對象

阿莊呢幾日都話，無論大市係向上抑或向下突破，走勢都會來得頗急，果然如是。恒指裂口低開，淡友淡淡定有胡食，可憐班牛仔養得咁上下肥，又攞晒去劏，尋日共有34隻牛仔被強制收回，涉及嘅恒指牛仔街貨估計約有10億份

技術上，若恒指未能迅即收復萬九關，下一個支持要睇50日線18,888點。畢竟今次跌市由外圍金融市場引發，解鈴還須繫鈴人，暫宜冷靜觀望歐債危機發展，別輕舉妄動。