股海實戰：國航股價隨時一飛沖天

上周港股由外圍消息主導，周初成功下試萬九點支持，但反彈則受制於兩萬點關。上周五港股沽空比率創八月一日以來最低，僅7%；牛熊證及窩輪佔大市成交27%，二者數字均遠未及高峰。再睇上周恒指牛仔街貨量已增至同熊仔街貨量相若嘅水平，綜合得出嘅結論係，好淡勢均力敵，衍生工具對大市影響下降，後市一旦以大成交挾穿20,300點，意味係「堅升」，所以呢一刻即使未夠信心做好友，都唔好隨便加沽。

上周中國人壽（02628）強勢乃近年少見，單周升幅超過13%。阿莊跟進嘅安碩A50（02823）走勢亦對辦，上周五高位見12.12元，收報11.92元，升1.7%，成交23.5億元。究竟國壽同A50走高有咩啟示，當然係同A股展望有關。

國壽成追落後對象

事實上，今年以來A股表現不振，唔少A股基金都揩大鑊，如今中央既已定調要行「微調」，至少心理上大家都唔使驚再會有收緊銀根措施出台，所以無論係基金經理抑或散戶，都將年底成績表押注喺未來個幾月嘅A股表現。國壽係基金同散戶嘅至愛，成追落後目標唔出奇；至於從A50入手，則可免選股煩惱。

但當然，外圍因素影響仍大，大眾對股市嘅良好意願能否實現，要睇歐洲同美國生唔生性。上周歐洲突然減息，美國又可能會推短期措施刺激經濟，照睇各國係有誠意解決危機，只要希臘唔好再發窮惡，歐盟救助方案順利落實，大市確有條件做番好啲。

上周五升市，個別板塊不乏好消息，其一係發改委擬放手由三大石油集團自動調整油價嘅消息，刺激石油石化類股份走高。另一單就係康師傅（00322）停牌，並宣布全購百事可樂喺中國嘅非酒精業務，相信今次購併能為業務注入新增長動力。

人民幣兌美元上周五首次升破6.32關口，報6.3198，再創自匯改以來新高。粗略統計，自十月以來，人民幣經已升值0.6%，若與年初比較，升值幅度超過4%。人民幣升值，對於主要資本開支為以美元進口飛機，且負債偏高嘅內地航空股有利，估計今年三大航空股又會錄得可觀嘅匯兌收益。上周五國航（00753）升6.75%，收報6.33元，睇走勢上月已成功下試由去年末季延伸嘅下降通道支持，加上即將進入航空業旺季，短期升勢可望持續，順利突破50日線6.5元，目標向通道頂部7.2元推進，穿5.7元止蝕。