Fundman睇市：買定數碼通儲電話費

近排望住枱頭閃爍的報價系統，間中都會有幻覺以為自己身處梳打埠的high roller table。八、九月，美國國債上限加埋歐豬危機，恒指由22,663插到16,170點，跌6,493點，股市從來抗拒不明朗因素，基金經理沽股票擁抱現金，仲可以理解。不過，之後從16,170彈番到20,272點，這4,102點升幅代表甚麼，筆者就如丈八金剛，摸不着頭腦。

先唔講今日「希臘長毛」George Papandreou聯袂六成希臘民眾，唔領歐盟與國基會嘅情（錢），準備搞公投決定削鬆五成抑或學冰島將經濟來個ground zero。EFSF錢從何來？其他歐豬國融資成本不斷攀升去到難以長久支撐的水平（意大利債企住6.14厘，比德國的1.81厘高4.33厘），九萬幾個問題，根本搵唔到答案，4,000點的反彈，反映基金經理大都以賭鋪勁心態，希望第四季埋單前收復失地，再唔係用理智去為股市把脈。

單日轉向信唔過

恒指自20,272點開始調整，借美股隔晚跌近300點，大市昨低開後，試一試全日低位19,024點後，借A股「穿底破頭」，大孖沙再挾淡倉，恒指低位回升超過700點，收19,733點，升363點。淡友捱打，沽空佔總成交比例，由前日的9.33%回落至8.15%，十月期指結算日至今，由高位插到昨日朝早再反彈，指數途程達1,957點，做好友唔易，做淡友更難。睇見歐洲期貨早段受港股熱烈氣氛帶動，係威係勢，但無耐德國公布失業率兩年來首度回升，歐元區十月PMI創廿七個月新低，意大利、希臘兩隻歐豬PMI更係去到43.3及40.5，衰到無朋友，歐股同港股掉轉嚟，玩高開低走，信股壇風水佬跟「單日轉向」尾市摸入，只怕又要表錯情。

近日，就取消手提電話定額月費無限任用計劃，電訊商放風試水溫，亦傳電管局最遲年底前推出公平使用守則（FUP），明年生效，畀流動電話網絡商在計費及新合約上作出調整。

電訊商要加價，理由係有部分人士濫用頻譜，藉任用數據來BT檔案及電影。老實說，家用寬頻大部分月費計劃都是無限任用，到底有幾多人會「周街」用龜速的3G網絡BT？電訊商點解唔限制極少數用流動設備BT用家（唔少家用寬頻就設有限流系統），卻走去懲罰全部客戶，逼大家就住就住用？講到底都係錢作怪，為加價巧立名目。

數碼通（00315）吹風會，顯然唔想為加價開第一槍，免得趕客，表示暫時無意收回無限上網計劃，但就話收回無限上網計劃是大勢所趨云云。商業社會將利潤最大化係天經地義，但筆者找來年報看看，數碼通○七年購買固定設備，佔總收入比例9.68%，之後在○八及○九年升至13.1及13.9%（估計同iPhone及其他智能電話普及有關），一○年回落至12.3%，一一年更只係10.3%，頻譜不足，到底係源於濫用抑或硬件投資不足，導致不勝負荷？看官自己衡量，但不應單是歸咎BT客。

姑勿論點，歐美不少市場推出更高速的LTE都順便將無限任用取消，史提芬作為用家，可能真係要盡快對沖一下，買數碼通或者和電香港（00215）賺番些少台費。