Fundman睇市：騰訊揸半年贏面高

周四，十月期指結算前夕，港股勁升622點，報19,688點，大市總成交似模似樣，升到超過一個月高位，達940億元，四十八小時之內，中、美、歐夾手夾腳做了一場大龍鳳，先係溫爺爺的「適時適度進行預調微調」言論；繼而是美國商務部公布的九月耐用品定單減少0.8%，跌幅低過市場預期，波音飛機等重磅運輸股份勁升，帶動美股大升；再來是歐盟峰會同意以槓桿化擴大歐洲金融穩定措施（EFSF）規模四至五倍，並落實希臘國債削髮五成，換取IMF一個為數1,000億歐元的援助計劃。

短短一個月，市場由恍如末日將至，到齊齊高歌明天會更好，港股從16,170點起步，第一波升至18,908點，之後調整只係即市穿一穿0.618支持17,862點，去到17,782點又再掉頭回升，回吐幅度之淺，其實係八月跌浪以來首次，已預期一次大規模殺熊、挾淡的活動會出現，只係筆者低估了今次挾倉的威力，EFSF拍板前後，恒指由17,782點上到19,688點，合共升1,906點，幾乎毫無阻力。

芬佬追數焗入市

結算前報復式挾倉，筆者都唔敢輕舉妄動。同幾個長倉基金經理閒聊，佢地話十月中，唔少行家為應付贖回，被迫萬七、萬八之間出貨，眼見第四季贖回窗口快將完結，個市又咁挾法，已經唔能夠再坐埋一邊做觀眾，開始減現金比重焗住再入市，否則第四季跑輸指數幅度會更大。人人以為基金經理係先知，可以高沽低買，不過好多時候，係形勢比人強，睇相佬呃你十年八年，筆者可以寫包單話你知，下半年至少七成以上港股基金，表現隨時差過買盈富（02800），都咪話唔大鑊。

內銀股係近期空倉回補主角，由第三季業績，暫時僅中行（03988）比較令人失望，其他都算對辦，雖然大家明知出年內銀貸款質素有變壞，無變好，惟礙於第三季業績至少問題未浮面，加上溫爺爺講到明會微調從緊政策，空軍唔敢再放肆，重農行（03618）再升11.9%，工行（01398）升7.6%、中信行（00998）升7.5%，炒到好似三四線股一樣， 睇番重農行及中信行已經升穿八、九月份的沽空重倉區，遲來的空軍今次真係要輸入肉。

早前有證券業人士要求監管當局限制沽空，筆者已講明沽空是兩面刃，一來睇淡未必贏硬，空軍是以無限損失（理論上股價可以無限上升）博有限利潤（股價最多跌到1仙），遠的不計，基金愛股騰訊（00700），早前股價被隊穿140元，當日沽空股數創今年新高，輾轉一個月唔到，反彈返去185元，空軍一股輸45元，帳面輸三成二咪話唔傷。

相對內房、水泥、內需股，虛擬世界受實體經濟周期盛衰的影響相對較小，騰訊中期業績就有41.1%增長，賺52.2億元（人民幣．下同），預期全年賺107.6億，相比去年同期的81.1億，升32.6%，儘管股價反彈唔少，但預期市盈率25.7倍，比○九年海嘯最低位24.3倍，只係高5.7%。配合內地智能手機發展，近半年騰訊更積極由文字擴展到視頻內容，估值在合理範圍底下，如果能夠在180至185港元範圍內入貨，持貨半年值博率應該幾高，不妨留意。