股海實戰：金風科技有勢追落後

呢轉「屠熊記」應該接近尾聲，尋日大戶盡殲以十億份計嘅熊證之後，牛熊證及窩輪佔大市成交比例急降至19%，加上十月期指結算，好淡勝負已分，早前大量股票沽空，呢轉亦已補得七七八八，阿莊聽聞雖然尋日確有傳統基金順勢入場SHOPPING，但超級大戶已喺高位反手開下月期指淡倉，唔排除未來一、兩個禮拜，恒指會維持喺萬九點樓上，等完成派發及養肥批牛仔，先至再落閘放狗！

技術上，八月初恒指高位22,808點，跌至十月初低位16,170點計，以反彈跌幅嘅一半即係19,489點，0.618就係20,272點。尋日三點半左右，期指確曾欲試19,500點承接，但眨眼已掉頭抽高，十一月期指以全日高位19,740點收市，相信呢轉係由淡友平倉盤所帶動。點解咁講？睇睇尋日早段十一月期指低位見過18,973點，唔少炒家被騙入場做淡，結果即日被挾800點，又唔知尋晚外圍挾到咩境況，惟有即日投降平倉計數！

提防大戶掉頭殺落

若然未來數個交易日恒指持續高企，10日線（18,626點）有機會抽穿50日線（18,919點），增強投資者入市追貨嘅信心，故話今次反彈浪會衝穿兩萬點，唔係冇可能。所以即使想開淡倉，亦可以慢慢嚟唔使心急。

阿莊睇唔好環球經濟，呢轉反彈浪一直冇做嘢，眼見唔少股票大幅反彈，確實有啲唔自在，但記得身處熊市首要做嘅唔係贏錢而係唔好輸錢，咁錯過熊市反彈亦唔使睇得太重。參考金融海嘯後，美國銀行業為提高資本金比率而集資一役，股價大跌，依家歐盟峰會定調明年六月底前歐洲大型銀行股要將資本金比率提高到9%，話唔定今年底前歐洲銀行就會齊齊展開「籌款」活動，並成為大戶推動下一輪股市大跌浪嘅藉口！

講番個股，尋日股票雞犬皆升，中資股股價愈殘挾得愈勁，單日升一、兩成係等閒，內銀、內房、建材，甚至利淡因素揮之不去嘅太陽能板塊，都全線飆高。尋日A股環保能源板塊已開始有炒風，若然忍唔住手想小注追落後，不妨由此板塊入手。

講到價殘，風電股金風科技（02208）算係「表表者」，股價由五十二周高位21.2元跌到落低位3.26元，累計跌幅達85%。近月走勢有改善，昨日隨大市上揚，急升12%，收報4.88元，成交股數1,866萬股，乃四月廿一日以來最大單日成交股數。若然呢轉成氣候，目標上望5.3至5.4元，支持位喺4.3元。