商廈租務旺到年底

過去幾個月工商舖市水盡鵝飛，唔少代理都話好耐無開單做買賣，平日唔做租嘅代理都密啲手搞租。據講依家大行、細行來自租賃成交嘅比例，差唔多去到七成，同旺市月份只有三、四成比例，明顯多咗好多。今年底前寫字樓焦點仍集中租賃市場，加埋旺季效應，相信今季租金有3至5%升幅。

劉SIR同美聯商業董事黃漢成傾開，佢話前幾個月寫字樓買賣一個月比一個月少。上季嘅成交量略多於約620宗，同今年第二季比，少咗近四成；雖然經濟差咗，企業擴充步伐卻未有退縮，依家唔少代理同行都積極於租賃市場搵生意。

代理收益 租賃佔七成

事實上，近月多間代理行寫字樓營業收益主要嚟自租賃，比例更加由月前正常水平嘅大約三、四成，去到目前大約七成，而個別行嘅比例更去到八成半水平。

踏入傳統寫字樓租賃市場旺季，租金升幅更加明顯。黃漢成話，依家中環等唔少傳統商業核心區寫字樓空置率只有大約3%，加上每年十月到十二月都係寫字樓租賃高峰期，加上銀行收緊商用物業借貸成數同條款下，相信租轉買個案繼續減少，租賃市場相信可以逆市睇高一線，保守估計今季商廈租金最少有3至5%升幅。

港島區近三季漲租28%

睇番市場數據，近排寫字樓租金未有受大市回落氣氛影響，仍然十分「硬淨」。今年初港島主要寫字樓每方呎租金約43元，之後連升八個月，最新呎租達55元，累積升幅接近28%，跑贏住宅租金，所以唔少投資者都已轉商廈市場。