Fundman睇市：茂業空軍唔吼揸得過

九八年八月亞洲金融風暴，香港特區政府掃入千七億股票，挾走國際大鱷之餘，埋單仲賺過千億，在政府入市干預股票市場的歷史中，絕對係絕無僅有。星期二下午，中央匯金證實掃入四大內銀股股票，展開托市行動，心水清嘅，可能記得○八年匯金托市，只係托高股市個多月時間，好快股價就再受地心吸力影響，今次匯金可唔可以摸到底入市，筆者認為機會只係五五波，由大孖沙的沽空數字來看，唔信的對沖基金經理，人數似乎較多。

沽家仍然主導市場

港股昨日早市開高730點，以18,441點開出，之後全日級級落，沽家顯然仲係主導市場，全日沽空佔成交比例由周二的8.3%微升至8.5%，再睇四大內銀股，建行（00939）全日沽空股數7,575萬股，比前日多443%！中行（03988）沽空增315%、農行（01288）增161%，最少的工行（01398）增89%。阿爺托市，空軍唔單止未驚過，仲一個唔該加注賭大啲，到底最後鹿死誰手，惟有等時間告訴我們。芬佬界押注祖國經濟硬着陸的傾向未有動搖（尋日仲有佛山傳出有限度放寬限購令！），最慘係跟托市消息買貨的散戶，偷雞唔到蝕把米。

近幾日，「歐豬」國及包括滙控（00005）在內的歐洲銀行，其違約風險掉期溢價（CDS）由八月底高位回落，支持環球股市呈現一個快速反彈，但中長線而言，CDS溢價仲係比七月時高一大截，希臘終極解決方案似乎有拖無欠，債權人同出資的歐央行始終就撥備比例講唔掂數，似乎唔拖到再有銀行出事，其餘四隻「歐豬」的國債問題，未有耐可以坐低慢慢傾。

歐洲央行行長特里謝出席歐洲議會經濟及貨幣事務委員會時提出，歐洲危機已擴散到系統性層面，短期融資市場「水緊」情況惡化，由於歐盟金融體系相連性高，大幅蔓延風險升溫，將影響歐盟金融穩定。常言道人之將死其言也善，特里謝任期仲有唔夠二十日，大可拍拍屁股走人，仲繼續用咁嚴重的字眼呼籲歐盟要齊心解決危機，多少反映今次危機，央行內未有耐達成共識。

講番股市，百貨股茂業（00848）公布首三季營運數據，特許專櫃銷售總額按年升49.45%，同店銷售增長23%，十．一黃金周期間，銷售增長更達37.79%，同店銷售升27.78%。不過八月深圳舉辦世界大學生運動會，長假分流區內客源，則對第三季有一定影響。同金鷹（03308）及百盛（03968）相比，茂業近期股價都算弱，八月初仲喺3.6元水平，上星期最低去到1.42元，累跌逾六成。主要係中期業績麻麻，純利僅增5.2%，至3億元人民幣，引發基金清貨潮。上半年業績失算，主要是成本壓力漸現，毛利率由去年同期近74%跌至66%所致。

昨日茂業股價在第三季營運數據曝光後，急彈9%，現價預期市盈率12.4倍，較同業低，但到底係買增長潛力較大估值稍高的，抑或增長可能較低而股價低殘的？確實見仁見智，但見近期幾隻百貨股被空軍狂轟，唯獨茂業不在空軍名單之列，2元樓下看來經已夠平，揸貨者也可稍為安心，等待股價進一步反彈。