Fundman睇市：利豐身價高宜迴避

睇住尋日港股先跌後倒升，再跌過，隱然令人覺得，喺聯儲局一連兩日議息結果水落石出之前，無論你係好友定淡友，都係好似盲頭烏蠅一樣兩邊撞。恒指收市跌190點，報18,824點，成交658億元，單睇期指由月初補裂口失敗以來，十四個交易日中，有十二日出現陰燭，大戶做邊一邊比較積極，已經一清二楚。

市況唔得，小南國上市打退堂鼓，女股神劉央出錢又出力的三一重工，最後都落得押後上市收場。俗語話，勉強無幸福，咁差市況「夾硬」上市，最後公司同股東都無益處。唔信？不妨睇番今年54隻成功上市嘅新股，閣下估吓今時今日仲企响水面的有幾多隻？答案得7隻！即係話有八成七未夠秤新股，唔夠一年已做晒潛水艇，部分「深海作業」嘅，好似泰凌醫藥（01011）及友川集團（01323），分別比招股價低71.5%及75.3%！

淡市新股玩唔過

咁多年經驗，筆者見過唔少公司，上市前被私募基金出錢出力催谷，再交保薦人化個靚妝安排上市，協助套現，唔少份業績好似飲完齋啡加紅牛，再食埋類固醇。當然當中不乏小部分能夠透過踏進資本市場跳板，擴展業務發揚光大，但較大部分係虛不受補，透支過度隨即走下坡。姑勿論如何，市旺仲可以玩票性質抽來開高即賣，反之市淡之時，新股是少買少錯。

筆者講過，九七及○七年股災，港股估值都曾經短暫跌穿八倍水平，目前則稍低於九倍，可以相信今日大市即使未見底，除非上市公司盈利跌幅遠超出估計，否則應是離底不遠矣。有趣的是，恒指成分股兩極化的趨勢都幾嚴重，新世界（00017）、九倉（00004）、太古A（00019）及國泰（00293），往績市盈率都低於3.8倍，前3隻如果撇除物業重估溢價，實際數字應該稍高，但國泰卻是真的低估值，可見市場對其未來前景是相當睇淡。

反之，最高估值的一群，包括剛出業績通街眼鏡碎的思捷（00330）、聯通（00762）、中國鋁業（02600）、騰訊（00700）、恒安（01044）、港交所（00388）、百麗（01880）、煤氣（00003）、利豐（00494）及平保（02318），都在二十倍以上，比大市平均數字高近倍。

思捷近日跌完可以再跌，大孖沙不存懸念；聯通多得3G收入增加，業績應可翻一番令估值回落；中鋁筆者實在摸不清氧化鋁價格的發展，無能力畀意見；騰訊、恒安、港交所及百麗都是前景較佳，可惜估值太高的股票。公用股中，買煤氣收息倒不如買中電（00002），數來數去，恒指成分股中筆者認為最應該避開的可能是利豐。

撇開與瑞銀的爭拗，利豐上半年每股盈利跌21%，已經通地眼鏡碎片，最重要係街外預測的全年業績仍然傾向樂觀，估全年賺6.02億美元（下同），即下半年要比上半年的2.36億盈利反彈55%，但睇番今日主要市場美國的情況，實在難以樂觀，何況股市目前通街都係平貨，筆者覺得看官應該避開這貴價股。