本小利大車位喪炒

政府舊年推出額外印花稅措施遏炒，令住宅炒賣成本大增，唔少投資者轉去炒車位同工商物業，劉Sir有個住喺九龍站擎天半島嘅朋友，年頭已經想買番個車位自用，但最近發現車位價格升幅驚人。睇番擎天半島多達20幾宗車位成交係今年買入再轉售，個別車位更喺半年間五度易手，期內做價累積升一倍。

九龍站屋苑中，以擎天半島車位今年升幅最顯著，依家有部分車位做價已突破100萬元。

好似M層一個雙號車位，今年一月初以約55萬元登記易手，之後喺一月中、三月下旬同四月底三度登記轉售，成交價依次近73萬、近86萬同近100萬元，每名業主賺幅約15至32%。

不過，咁都未算犀利，上述個車位喺今年中又再賣出，成交價已經逼近114萬元，即短短半年做價已累升一倍。

凱旋門車位208萬又破頂

依家九龍區最值錢嘅車位集中喺九龍站，早前創下200萬元九龍區最貴車位嘅凱旋門，最近做價再破頂，一個B1樓車位以208.8萬元售出，輕微打破屋苑對上一次紀錄，保持九龍區首名位置。

而有力挑戰九龍區車位紀錄嘅何文田雅利德樺臺，繼○九年有車位以170萬元賣出後，近期有車位以200萬元賣出，足以媲美九龍站水平。

至於港島區大型屋苑之中，一向以西區嘅寶翠園車位做價遙遙領先，但近年有唔少新樓盤落成，令港島區最高車位價出現平分天下的局面。

港島南南灣近期有單號車位以200萬元易手，平咗寶翠園最高車位價紀錄，而該車位原業主持貨約三個月，帳面速賺47萬元，升幅高逾三成。

近期市況未明，嚟緊政府仲會唔會出招再㩒一㩒住宅樓價升勢仍然係未知，而投資車位相對本小、風險低，相信搶手嘅豪宅車位，炒風依然未完。