愛蝶灣搶上$7500/呎

近幾個月樓市受多項因素困擾，買家入市態度已經冇之前咁進取，搞到上個月二手私宅市場交投已經開始萎縮，不過居屋市場暫時似乎影響唔算太大，近兩個月仍然有唔少破頂價成交。

繼早前筲箕灣東旭苑有低層戶成交價去到623萬元創歷史新高後，同區愛蝶灣最近出現一宗罕有白表價成交，一個園景單位以呎價逼近7,500元賣出，創屋苑新指標。

愛蝶灣屬區內較新落成嘅居屋，加上唔少單位有海景，業主賣出單位後，好難再喺同區買番質素相若嘅私樓，所以市場唔單止白表放盤絕無僅有，即時綠表價放盤都唔多。至於近期以創呎價新高賣出嘅單位，面積約567方呎，屬園景單位，成交價接近424萬元，呎價逼近7,500元，超越今年六月登記賣出嘅5座面積約505方呎單位，成交呎價約6,900元。

東區盛產居屋樓王

至於愛蝶灣今年到依家錄得唔夠20宗買賣登記，當中白表價成交只得約2伙，而今年內綠表成交呎價就介乎3,600多元去到5,000多元。

全港最貴嘅二手居屋，可以講全部集中喺港島東區，九七年時鰂魚涌康山花園有單位以560萬元賣出，成為居屋樓王，紀錄保持到上兩個月，先至畀東旭苑東緻閣一個低層戶以623萬元打破，成為最新嘅居屋樓王，個單位雖然位處海景，但東緻閣臨海而建，即使低層單位都可以享有海景，加上單位面積829方呎，屬三房設計，客飯廳長方形，間隔受歡迎，故有買家願以創新高價購入。