股海實戰：華創攻守兼備之選

尋日港股受累內銀股沽壓及A股回落，恒指回試22,500點水平支持。不過，執筆時傳來人行加息嘅決定，終於消除不明朗因素，話唔定A股真係有轉機！

回說尋日市況，淡馬錫大手減持建行（00939）及中行（03988），咁大批貨出街，除咗可能被空軍用作補倉外，亦唔排除有國家隊入場接貨。至於今次淡馬錫以重整投資組合為名，大手沽售內銀股，背後真正動機係咪睇淡內銀股前景，倒值得關注。

內銀股沽壓不輕

圍繞內銀股不利消息不絕於耳，有國際評級公司指，約有3.5萬億元人民幣中國地方政府債務沒有喺國家審計署報告中提及，由於現時尚無具體解決方案，內銀體系嘅信用展望可能會轉為負面云云。重重圍困，難怪內銀股全線低收，跌幅最大嘅係農行（01288），跌4.7%，失守4元關，成交額11億元，其中3.96億元為沽金額；另建行及中行股價亦跌逾3%。

阿莊相信，中央深明一個穩定嘅金融體系對中國經濟持續發展嘅重要性，故不會容許銀行體系出亂子。繼民企股後，老外言行合一唱淡內銀股，背後有咩盤算，不得而知，但若然呢個陰謀論真係存在，相信有關方面不會坐視不理，股民亦宜留意股海暗湧，事關大撼大難免會殃及池魚！

近日走強嘅汽車股有調整，游資暫避風頭，轉攻半新股，見藏水（01115）繼續挾高，交投活躍，高位曾見4.35元，收報4.17元，升4.77%，成交1.51億元；雙樺（01241）創掛牌以來新高1.81元，收報1.69元，升近15%；另包包股米蘭站（01150）亦有翻炒迹象，收報2.25元，升5.63%。呢類熱炒嘅半新股特色係貨源歸邊，幾時開車幾時停車實在係無得估，趁人頭湧湧即市短炒未嘗不可，但宜盡量避免持重倉過夜，以免一旦停車熄匙接火棒。

收購具策略意義

華創（00291）近日宣布，向母公司購入深圳華潤堂全部股權，總代價7,296萬元人民幣（其中現金代價為1,059萬元人民幣）。據講深圳華潤堂主要喺江蘇、廣東、山東、湖北及浙江省內嘅14個城市經營「三九」品牌下嘅152家連鎖零售藥房。

雖然今次收購作價相對於華創嘅市值而言，規模有限，但卻可藉此與旗下現有健康護理零售業務如「VivoPlus」及「華潤堂」喺採購及庫存管理方面產生協同效益，而日後該152家連鎖店將統一為「VivoPlus」及「華潤堂」品牌經營，既可鞏固集團喺江蘇、廣東、山東及浙江省嘅市場地位，亦可將業務覆蓋至湖北省，策略意義重大。

阿莊曾於五月下旬推介華創，指其勝在四平八穩，果然六月份華創股價穩如泰山，表現跑贏大市。內地推行個稅改革，目的係要穩住內需巨輪，以保持經濟持續增長，華創嘅零售消費概念凸顯，國策概念可捧，可續視為攻守兼備之選。

戰報

西藏5100水資源（01115）

阿May昨日推介藏水，由最低的3.95元，搶至全日最高位4.35元，即日獲利逾一成，可謂快靚正。

敏實集團（00425）

姚午齊上月三十日睇中敏實，股價由當日低位12元，逐步升至昨日最高的13.24元，累計賺超過10%。