Fundman睇市：博士蛙見底博反彈

內地五月份生產物價指數達6.8%，高於預期的6.5%，但更多人關心的消費物價指數，由四月份的5.3%升至5.5%，符合預期，按月升幅0.1%，反映春節後內地通脹有受控迹象。正當中港股市諗住CPI曝光，有一兩個星期鬆吓（坊間估計因基數低關係，六月數字會去到6至6.3%才見頂回落），但人行再一次「估佢唔到」，揀A股收市後加存款準備金率50點子，美銀美林話加存款準備金的時機，確係意料之外，皆因近期一星期人仔拆息維持4.5厘高位，而坊間對經濟硬着陸的憂慮全面升溫，本以為人行會暫時高抬貴手。不過該行亦補充，人行對緊縮政策影響經濟多少有顧忌，故先加存款準備金率，而不是威力更大的加息甚至調低貨幣供應目標。

昨日恒指十足十坐過山車咁，早市最多跌210點，午市卻倒升134點，多得人行出招，埋單倒跌12點，報22,496點，恒指午後高位22,642點，差4點就重上250日線樓上，收市前好友加多兩錢肉緊，六月期指升71點，報22,491點，扣番恒指除息因素，實際高水48點，短期反彈可能未完。

騰訊勢弱勿沾手

睇番美國掛牌嘅中國網絡民企百度同新浪（代號︰BIDU、SINA），一樣無運行，前晚繼續開高收低，兩個月由高位分別跌掉兩成四及四成一，網股清倉潮有蔓延之勢，騰訊（00700）跌5.2元，收報201.4元，乃昨跌幅最大藍籌。常言道，市帳率、市盈率可以簡單評估1隻股票抵唔抵買，但最重要亦最難嘅係掌握市場氣氛，以及投資者信心一類的無形變數。在一眾內地網股中，騰訊市盈率的確比較「低」，一一年估計介乎二十五至二十八倍！但股市寧買當頭起，騰訊走勢才剛轉弱，博反彈睇怕未係時候。

買Prada（01913）要畀增值稅，又要股息稅（執筆時未知會否獲意國政府豁免），居然仲可以二十七倍的天價定價，真係厲害！全球奢侈品品牌，今時今日都想做內地消費者生意，因利乘便雲集香江，盛傳周大福保薦人都希望爭取三十倍以上市盈率招股。

本地奢移品零售股來來去去得幾隻珠寶股，但睇番估值廿倍樓下嘅本土零售品牌，選擇都唔少，短期有機會借勢做好，例如波司登（03998）、好孩子（01086）及博士蛙（01698），尋日走勢就相當搶眼。

一孩概念有市場

去年九月掛牌的博士蛙，以博士蛙、Baby2及Dr. Frog等自有品牌，主攻兒童服務市場。近半年由掛牌高位7.76元，陰陰乾去到上個月連4.98元招股價都不保，最低見過4.04元。同好孩子一樣，博士蛙上市時都大賣一孩政策概念，芬佬睇好內地父母極肯使錢在家中的「金叵羅」身上。

概念相似，兩隻股票估值也十分接近，一二年預測市盈率好孩子是13.1倍，博士蛙12.7倍，考慮到後者盈利基數較大（一二年是前者的三倍以上），大孖沙博反彈往往先揀規模較大的入手，加上股價短期有見底迹象，不妨留意。