股海實戰：海天國際大行積極掃貨

長假後終於等到大方向出現。尋日恒指失守50日線23,452點，收報23,315點，跌318點，主板成交增加至778億元，反映唔少好友都失望離場。若恒指今趟未能迅速收復50日線，有機會引發更大型嘅沽壓，別輕率入市博反彈，畢竟「五窮」之月不宜攻！

好友信心下跌落場減倉，見到唔少強勢股都成落水狗，就如水泥股，安徽海螺（00914）及中國建材（03323）同跌逾4%；騰訊（00700）曾低見207.6元，收報210.6元，跌3.3%。內地A股亦唔好得去邊，滬綜指跌穿2,900點，收報2,866點，跌幅2.26%，短線2,850點係一個大位，若然確認失守，則須下試2,800點支持。

中國伽瑪醞釀變身

異動股方面，尋日復牌嘅中國伽瑪（00164）宣布就收購重慶兩個露天釩礦場訂立備忘錄，代價3.5億元，為應付資金需要，公司向主要股東發行可換股票據（初步換股價0.27元）集資1.05億元；而通告同時披露可能收購四川嘅稀土冶煉及加工業務，惟二者交易條款尚待最終落實。

公司謀變身礦業股，消息刺激股價表現，復牌後曾高見0.305元，收報0.227元，升9.13%。如今涉足純釩礦嘅公司唔多，而釩除可應用於生產鋼鐵之外，仲可以應用於節能及環保汽車電池等多個領域，商機可觀。之不過，呢鋪「生米能否煲成熟飯」，尚有待觀察。惟見到交易雖未成事，但主要股東肯科水支持，又似乎係有心做大事，不排除仲有消息跟尾。姑勿論如何，短線急升過後或須先作調整，可觀察0.2至0.22元承接再考慮。

講完變身股，又睇番隻實力大價股——海天國際（01882），尋日成跌市奇葩，高位做11.8元，收報11.76元，升幅7.3%，成交3,867萬元。

早前阿莊亦提及過呢隻實力股，公司主要從事製銷注塑機業務，去年純利大增1.36倍至10.62億元人民幣，毛利率增至30.2%，表現亮麗。

收購活動陸續有來

截至去年底，公司手持淨現金額達到20.25億元，大有條件作出購併加快業務發展。最近公司便斥資6,000多萬元人民幣，收購海天精工製造嘅計算機數控車床及加工中心，此舉有助配合公司提升零部件加工能力和產能嘅需要，唔排除類似嘅收購活動陸續有來。

展望今年，位於越南嘅新產能料於年中前開始運作，以配合出口業務嘅發展，又擬推出新產品包括新一代Pallas系列液電複合節能注塑機以及新一代Mercury系列全電動注塑機。

論估值，現價預測市盈率約十二倍，唔見得係十分昂貴。前日股價由11.58元回落至10.86元，但成交未見大增，反觀尋日低位大行買盤積極吸納，成交股數比前日翻一番有多，足以反映大戶取向。以預測市盈率十五倍計，目標價定在15元，向下重要支持喺50日線9.89元。

戰報

遠東宏信（03360）

阿莊上月八日推介嘅遠東宏信，尋日再創上市新高9.17元，以當日低位7.55元上車計，累賺逾21%。

東岳集團（00189）

東岳尋日一度高見8.96元，Sammi上周五推介時低位只係7.78元，短炒亦有超過15%的進帳。