股海實戰： 海天國際盈利大躍進

歐洲加息兼夾日本再有七級以上地震，但上周五日本股市照樣高收，內地A股亦冇有怕，滬綜指突破3,000點後頭也不回，見今年以來高點。壞消息對外圍股市起唔到作用，港股無後顧之憂，恒指再升114點，最後收報24,396點，主板成交近900億銀，一句講晒：冇得沽！

市況好轉，唔少企業都把握集資機會，雅居樂（03383）及旭光（00067）發換股債，股價分別升1.6%及0.6%。

匯賢成市場焦點

提及內房股，今次整體反彈表現勝於預期咁啱長實（00001）將部分內地房產包括成房地產信託基金並分拆上市嘅匯賢房託（87001），今日開始公開發售，由於係香港首隻以人民幣計算嘅房產信託基金，新鮮感料可增吸引力，難怪各大銀行及券商磨拳擦掌爭奪孖展市場，話唔定次季IPO熱就由匯賢領軍，投資者亦多咗一個兼向高派息及人民幣升值概念嘅長線投資選擇！若然匯賢掛牌表現理想，估計其他大地主亦會跟風搞搞新意思，類似新地（00016）、恒地（00012）也可欣然受惠。

每年次季都係內地水泥業旺季，近月水泥股表現大勇，某程度已預視利好因素，嚟到呢啲水平短炒難度唔多唔少都大咗。上周五水泥股個別發展，海螺（00914）、中國建材（03323）、亞洲水泥（00743）、金隅（02009）及山水水泥（00691）亦低收，反觀台泥（01136）及潤泥（01313）則續創五十二周新高。咁多隻水泥股之中，阿莊首選潤泥，事關今年有機會染藍！

上周五股價同樣創出新高嘅，係從事產銷注塑機嘅海天國際（01882），高位見11.16元，收報11元，升幅4.76%，成交7,813萬元。與同類股相比，海天嘅優勢在於客戶遍布各個高增長行業，包括汽車、建材、家電、電子等，加上產品具創新能力，近年引入環保節能產品系列，啱晒國策嘴形，銷情理想。

工業股實力之選

舊年海天盈利突破10億元（人民幣．下同），毛利率增加4.3個百分點至30.2%，充分體現產銷上嘅規模效益。近日公司宣布斥資1.85億元拓展寧波嘅生產線，以其舊年經營業務現金流入12億元，手頭淨現金達20億元，應付資本開支綽綽有餘。

上月中海天公布業績後，喺盈利大躍進下，引發市場重估，至今股價已累升兩成多。考慮到比較基數上升，加上今年原材料價格較波動，人行收緊信貸或對下游需求造成影響，唔排除今年盈利增長會略為放緩，但相信要維持三成增長難度唔大，計落現價預測PE都係十一倍，息率逾3厘，股價高處未算高。還記得當年香港經濟起飛，工業發展迅速，投資工業股曾為股民創造唔少財富。如今嘅內地正係當年香港嘅翻版，市場增速和發展潛力更快更大，類似海天呢類工業股，可視為實力之選！

戰報

興達國際（01899）

阿莊上周一推介嘅興達國際周五發威，高見8.72元，較推介日低位7.44元，一周計已賺超過17%。

阜豐集團（00546）

阜豐集團上周五炒上高位6.25元。積奇上月二十四日推介時低位5.43元，若跟佢上車，賺逾15%。