股海實戰：海爾電器有條件見10元

尋日期指結算，總算扭轉二月份跌勢，恒指收報23,451點，升391點，已重上50日線，主板成交配合，達890億元，四月份期指低水12點。誠如阿莊尋日所言，若然外圍市況配合，四月份睇升機會大，又可以放膽啲睇吓仲有咩貨好買！

論板塊，最近水泥股最標青，山水水泥（00691）成功衝穿7元關，見新高7.44元，收報7.1元，升3.8%；台泥（01136）、安徽海螺（00914）、中國建材（03323）及亞洲水泥（00743）均創五十二周高位，坐貨坐中呢個板塊，選股仲使咩煩惱？

此外，內房股亦似乎唔多跌得落，兩隻龍頭中國海外（00688）及華潤置地（01109）分別升3%及5%、雅居樂（03383）及保利香港（00119）分別升4%及3%。內銀股除了重農行（03618）之外普遍做好。阿莊相信，無論係港股抑或A股，投資者都在等待入市訊號，一旦滬綜指確認突破3,000點心理關口，又或恒指以大成交抽穿24,000點，後市爆升動力不容低估。

講開內房股，上海實業（00363）去年度純利52.77億元，按年增長83.9%，每股盈利4.89元，末期息每股58仙，現價計往績市盈率僅六倍，真係平到你唔信，奈何阿爺打壓真係冇計！阿莊揸咗上實旗下嘅上實城市開發（00563），質到落2.5元呢啲位成交已大幅縮減，相信隻股經已收得好乾身，等緊幾時開車，阿莊一於唔贏唔走！

繼續睇吓業績股，海爾電器（01169）去年受惠家電下鄉、節能補貼及以舊換新等措施支持，全年收入大增1.78倍，至358億元（人民幣．下同），純利增1.15倍至9.64億元，不派息。受惠業績消息利好，尋日股價曾高見8.97港元，收報8.8港元，升4.76%，成交6,946萬港元。

協同效益逐步體現

年內，海爾嘅存貨周轉天數由○九年的十八天減少至十一天，而應收帳和應收票據周轉天數亦下降八天至七十九天，全年經營業務現金流入12.94億元，截至去年底止手頭現金及等值27億元，無借貸，可見財務狀況十分充裕，大有條件派發股息，但未有行動，相信正係為日後收購活動作好資金準備。

隨着內地繼續推行城鄉化，「十二五」期間興建3,600萬套保障房，勢必拉動家電產業發展，行業前景展望樂觀。海爾擁有全國性嘅知名家電品牌，去年收購母公司物流業務，亦完善了自身嘅產業鏈，協同效益可予憧憬。

踏入一二年，保障房落成潮對家電業嘅刺激會趨於明顯，相信今年海爾會積極物色收購，為搶攻新商機作好準備，目標係收購母公司資產抑或與海外同業聯盟，阿莊認為兩個可能性都存在。再計計數，現價往績市盈率降至15.9倍，就憑家電兼物流兩大概念，股價有條件叩10港元關，而50日線支持喺8港元。

戰報

合景泰富（01813）

積奇上周二推介嘅合景泰富連日做好，尋日高見6.47元，於推介日低位5.54元上車，最多賺近17%。

+23%

陽光能源（00757）

陽光能源尋日最高見過2.25元，錢進本月十八日已作推介，於當日低位1.83元上車，跟到足賺近23%。