Fundman睇市：建行已屆入貨水平

市場注意力由日本災情重新回到上市公司成績表身上，港股表現也變得更難捉摸，恒指由低位反彈過千點後，在23,000點樓上表現反覆，昨日跌90點，報23,068點。業績遜預期的建行（00939）及分析員期望過高的利豐（00494）繼續被糟質，跌0.17元及1.5元，兩隻股票加埋佔恒指跌幅六成一。

滬綜指尋日試一試3,000點樓上雙頂阻力立即腳軟，美電一度抽上7.8057的高位，今次港股反彈係咪差唔多？老實講，筆者無乜把握答呢個問題，睇番中美股市均已升穿「三一一」仙台大地震前水平，反觀日港兩個股市顯然弱得多，日股由10,434跌至最低8,227點，共跌2,207點，尋日收9,478點，僅收復了跌幅的56%。同期港股由23,614點跌至22,123點，共1,491點，暫時只係追番跌幅的63%左右。核洩漏愈搞愈大鑊，日股唔掂皆因出口商元氣大傷，可以理解，但何解港股衰埋一齊？筆者都想知點解。由班基金經理口風，似乎在內地通脹有受控制迹象前，佢哋買貨嘅興趣都唔大。

憧憬來季通脹見頂

第一季眨吓眼又快過，展望未來一季，分析員睇實內地通脹達至今浪頂峰（真係咁樂觀？），美銀美林預測下月十五日曝光的三月份通脹數字，會由二月的4.9%升至5.5%，六月之前，內地通脹數字會繼續向5.5至6%推進，到年底前再逐漸回落到4%左右。

假如中國通脹真係喺未來三個月見頂，困擾港股的陰霾盡消，股民今日或者係時候開始搵定目標，趁基金大戶未敢用盡現金入市前，儲定倉底。

建行總市值1.77萬億港元，是去年業績賺1,348億元（人民幣．下同）的11.1倍，以巨型銀行來說，26%的增長已相當唔錯，但股份仲要捱沽，緣於成績表不及分析員預測的1,371億元。筆者一向認為，國企分析員中應該以覆蓋銀行股比較「他條」，一來內地銀行通常每季有營運指引畀佢哋，而且季度業績基本上可以作為預測未來一季的基礎，形成內銀股業績較少有太多的偏差。成績曝光前，大行預測建行業績上下限，分別為1,497億至1,278億元，換句話，將中位數加減5至6%，已經可以涵蓋整個預測範圍。

營運數字表現理想

回顧首三季，建行分別賺351.6億、355.7億同397.5億元，累積數字1,104.9億元，市場失算，是第四季賺243.4億，較去年同期的206.3億增長17.9%，主要受一次性的非貸款減值大約40億所影響，由持續營運數字，季內淨息差擴闊8點子去到2.61%，非利息收入按季升16%，表現都相當理想。

市場預測建行一一年純利1,641億，每股盈利65.4分，市盈率9.2倍，預期股息回報4.67厘，種種數字顯示，以一間國家級銀行而言，建行估值相當吸引，至少比過往五年預測市盈率平均值13.3倍，仲有三成的折讓。股市對內地出現惡性通脹、銀行壞帳狂升顯得憂心忡忡，因而在內銀股身上，加上了極高的風險溢價，筆者自問樂觀得多，也相信當公眾看到通脹數字受控，只怕到時才追會為時已晚。