Fundman睇市：奶粉股缺乏利好因素

印象中，次次戰亂，金融市場都揀美元或黃金作為資金避難所，不過近日北非局勢緊張，上周末歐美盟軍開始轟炸利比亞政府軍，可是美元唔單止唔升，仲日日陰陰跌。美匯指數已由一月高位81樓下碌落75.48，穿埋去年十一月低位75.6，技術上，連○八年及○九年金融海嘯前後兩個低位（71.3及74.2）的延長線都失守。

近期市場廣泛討論，美國聯儲局有否需要再印銀紙，推QE3刺激經濟？由疲弱不堪的美元匯價，似乎反映匯市炒家的答案相當肯定。

港股欠缺方向，尋日主板成交縮至685億元，是近兩個半星期最少，恒指全日波幅135點，收報22,825點，跌32點。睇番恒指服務公司新產品─恒指波幅指數，從日本地震後高位30.56，大幅回落到19.35的災前波幅水平，看來影響股市的，會由外圍消息回歸到上市公司基本因素上。

瑞銀話截至周一為止，41隻MSCI中國指數成分股（佔指數28%市值）的一○年成績表曝光，平均盈利增長29%，較市場綜合預測高8%；值得留意的是，大部分毛利較去年有改善，但經營邊際利潤率卻是不及前年同期，反映上市公司成本壓力在上升之中。

雅士利毛利率下滑

食品股有異軍突起之勢，日本核危機開始污染食物鏈，外國的月亮已經唔再特別圓，基金開始向內地食品股埋手，昨日推介的康師傅（00322）股價升近5%，最為標青，連帶積弱已久的奶粉股澳優（01717）、雅士利（01230）及環球乳業（01007）通通死貓彈。

新鮮熱辣的成績表，雅士利去年營業額29.54億元人民幣，升14%，期內純利5.02億元人民幣，升24%，比去年十一月上市時預測的4.96億元人民幣多1.2%。

雅士利令唔少上市初期的捧場客焦頭爛額，招股價4.2元，從來無在二手交易中出現過，上市首日見過3.76元後，一直跌到最低2.24元，認購後死揸住唔放，最惡劣一刻輸掉四成七。本周初，連保薦人之一的美銀美林也捨之而去，將評級降至跑輸大市，目標價睇2.6元。

以88.3億元市值計，雅士利全面攤薄後市盈率14.8倍，內需食品股中唔算貴，但當然，如果同競爭對手環球乳業的7.8倍比較，是平中自有平中手。三聚氰胺、大頭奶粉及最近的皮革奶精，嚇怕唔少奶製品企業投資者，事關一旦出事，大規模回收令品牌受傷害，損失難以估計，奶粉股風險溢價大升，高估值不再，但過去一年仍紛紛上市籌集資本，說穿了，是為未來品牌形象推廣，以及自設奶場等高資本投入鋪路。

雅士利自從去年中開始，百分百從新西蘭採購原材料，因而令材料漲價快過售價，成本控制變得困難。去年下半年其毛利率開始下滑，收窄6.3%，至55.1%，經營邊際利潤收窄1.32%，至19.2%。今年新西蘭旱情加上早前地震，會否影響區內奶粉供應及價格穩定性，不妨拭目以待。

或者中期業績前，會有一段安全炒作期，但短期沒有太多有利條件，足以教基金經理回心轉意給予奶粉股更高的估值，能夠重返一月份跌浪的高位3元樓上，應已心滿意足。