股海實戰：三一國際走勢有睇頭

日本福島核洩漏危機受控制，股市平靜下來。港股尋日窄幅上落，恒指全日波幅僅134點，最終微跌32點收市，報22,825點，主板成交下降至只有685億元。反而內地A股表現唔錯，滬綜指差不多以全日高位收市。

隨着藍籌股陸續公布業績，基金季結亦近在眼前，踏入四月份，投資市場主調係咩，乃炒友最關心嘅問題，可惜目前尚未有好明顯嘅線索可供參詳。新股萊蒙國際（03688）首日掛牌即潛水，曾低見4.98元，收報5.3元，較招股價6.23元低15%，成交1.73億元。據講有幾家較大型嘅IPO正觀察市況，考慮在四月啟動招股活動。IPO表現往往與市況掛鈎，且看次季能否扭轉弱勢。

尋日阿莊提及恒基地產（00012）獲大股東入場增持，執筆時睇到大股東本周一再次入場增持，難怪股價繼續走強，尋日最高見過50.25元，收報50.05元，升2.77%，成交2.82億元。

阿莊注意到，恒地有隻公司輪（00879），將於今年六月一日到期，一換一，行使價58元。由於恒地現價仍較NAV折讓三成，若然市況配合，大股東繼續增持，隻股踢高兩成上番60元邊嘅可能性不能完全抹煞，屆時可以吸引公司輪持有人行使換股，則公司可藉此籌集達兩百億元。即使呢個預測未有成為事實，相對同類股，恒地估值亦屬偏低，阿莊左諗右諗，尋日忍唔住手入場以每股49.65元買入2萬股等運到。

有日本出口蔬果可能已經受輻射污染，令全球食家聞日本食品色變。不過，日本人總要食，土產唔食得落肚，就惟有增加進口應付需求，所以從事食品出口嘅食品股可望受惠。

中綠憧憬日本商機

中國綠色（00904）一向有產品出口往日本市場，截至去年底止中期，來自日本市場嘅營業額達到1.31億元人民幣，未來大可加大力度拓展日本市場商機。見近日該股股價做好，由5元邊反覆升至尋日高位5.85元，收報5.77元，升逾3%，博向上回補下跌裂口位，目標價睇6.4元，10日線支持喺5.4元。

講到日本核洩漏，中國三一集團旗下A股——三一重工向日本捐贈一架泵車協助救災，除了可以視為體現中日友好之外，亦讓全球知道中國重型機械品牌及質量水平。據講三一重工計劃今年來港發H股，而分屬同系公司、已在港上市嘅三一國際（00631）則主要從事應用於煤炭生產嘅掘進機及相關運輸裝備，尋日股價亦有睇頭，曾高見12.98元，收報12.9元，升7.14%，成交1.16億元。

三一國際將於三月底宣布業績，去年上半年實現純利3.41億元人民幣，料一○年及一一年預測市盈率可降至分別為三十倍及二十倍。再睇圖表走勢，二月底以來股價扭轉跌勢，短線回吐只要企穩11.5至12元區域，後市可望反覆向上，有力挑戰去年十月時高位13.98元。

戰報

MI能源（01555）

阿莊本月十一日話MI能源具增長潛力，當日低位只係2.91元，尋日升至3.33元高位，賺超過14%。

新環保能源（03989）

錢進周一推介嘅新環保能源尋日高見0.75元，於當日低位0.5元上車，短線食胡勁賺五成。