短炒倉：華晨汽車陪跌唔合理
福島核電廠事件仍在惡化中，日本當局仍在努力向機組注入海水，務求冷卻反應堆。另一方面，日本央行亦連日向市場注資，截至昨日傍晚，合計注入資金已達34兆日圓。原來無論應付核危機還是金融危機，辦法都係得一個，就係要靠「泵水」。
無論捱唔捱得過當前呢關，未來日本經濟仍然係相當手尾長。好似近日一眾汽車股，就因為憂慮日本零部件供應鏈癱瘓，故自地震發生後股價持續向下，但係連華晨（01114）亦要跌埋一份，志強就覺得唔係太合理。
目標價上望7元
眾所周知，華晨手上王牌係同德國寶馬嘅合營，而且所生產嘅汽車百分百都係內銷，零部件九成以上都係來自內地，同日本無乜關係。雖然內地車市今年有機會放緩，但主要係中下價車市場，寶馬這類高檔房車仍然係供不應求。華晨將於本月二十八日公布去年業績，早前已發盈喜，展望今年業績可望更上一層樓，昨日股價陪同其他車股再跌3.1%，收報6.22元，不妨候6元水平吸納，目標7元。
