股海實戰：MI能源增長潛力秤先

內地A股尋日終於回軟，畢竟兩會會期將近完結，維穩力量適時功成身退係正常不過，問題係呢輪先入場跟進嘅新錢能唔能夠撐住，但阿莊始終覺得，季結前恒指勢必有大幅波動，再睇外圍市經已初現波瀾，在此奉勸各位一句：要緊握扶手！

大市成交未見突破

尋日午後港股跌幅擴大，除了因為內地滬綜指被資源股沽壓所拖累而低收之外，尾市傳來穆迪將西班牙主權債券評級由Aa1下調至Aa2，前景展望負面，亦令港股添壓，最終恒指收報23,614點，跌195點，但主板成交冇乜點多到，只有714億元。

據港交所（00388）權益披露資料顯示，華創（00291）申報持有金威啤酒（00124）21.37%股權，估計涉資約12.5億元。若然各位有睇開呢個欄，都知道阿莊唔只一次話金威係好抵買嘅內地啤酒股，遲早會被行業龍頭睇上成購併目標。如今由華創入股，究竟作為大股東嘅廣東省政府點睇至為關鍵，暫時保持現狀係一個可能性，亦不排除會考慮先將金威私有化再跟華創傾。總之，金威呢鋪終於有運到，長情股東應該飲得杯落！

二○一一年福布斯全球富豪排行榜揭曉，長實（00001）主席李嘉誠以260億美元位列第十一名，並貴為香港首富。長實旗下嘅和黃（00013）尋日股價逆市靠穩，收報92.75元，升0.76%。阿莊依然相信，年內和黃可重登「紅底股」之列。

尋日推介嘅中信資源（01205）發盈喜，主要受惠年內分拆中信大錳（01091），加上環球經濟整體改善及公司控制營運支出，該股昨日曾高見1.77元，收報1.73元，升1.1%，表現遜於預期。

正式進軍海外市場

繼續睇石油股，半新股MI能源（01555）喺內地最多產嘅產油盆地松遼盆地擁有大安、莫里青及廟三油田，○七至一○年度日產量複合年增長率為13.24%。去年公司營業額18億元人民幣，增長54.7%，純利4.21億元人民幣，增幅2.8倍。

今年二月，公司宣布悉數收購哈薩克斯坦油氣勘探及開採公司Emir-Oil,LLC權益，標誌着公司正式進軍國際市場。

相對於分別分屬國企及紅籌嘅中石油（00857）及中海油（00883），MI能源勝在發展尚處於一個較低嘅起點，相比之下未來嘅增長潛力也會較大。雖然現價已較招股價1.7元累積一定升幅，但喺油價易升難跌，加上公司已開始進軍海外，購併消息帶來憧憬下，相信仍有炒作空間，下一目標睇3.5元，穿2.68元止蝕。

另外，阿莊見兩會會期就完，農業股冇咩大起色，手持嘅一拖（00038）股價又開始回軟，所以尋日上晝沽出持有嘅8萬股，平均價8.46元，蝕約4,900元，相對一月底該股曾低見7.32元，算係執番身彩，估計公司會喺四月中前宣布業績，睇睇此前有冇機會再撈平貨。

戰報

勝獅貨櫃（00716）

積奇尋日話勝獅貨櫃上升動力未減，逆市高見3.65元，於低位3.31元上車，即日鮮炒轉都賺超過一成。

中交建（01800）

錢進周三話中交建反彈持續，尋日抽高至7.18元，較推介日低位6.32元足足升幅有近14%，好眼光！