股海實戰：億和不妨睇位走一轉

上周五港股隨外圍做好，恒指一度升穿23,500點，收報23,408點，升286點，惟主板成交才746億元。若站在上落市嘅角度，嚟到呢啲位又可以開始沽，但當然，上落市猶如音樂椅遊戲，音樂幾時會停，阿莊都冇水晶球，且考慮到最近困擾股市嘅係地緣政治因素，變化難料，而兩會有咩新訊息，亦足以左右市況，加上上周五美股又低收，暫時都係宜守不宜攻。

兩會正召開，上周五阿莊提及嘅內銀股，果然再成升市領頭羊，招行（03968）、民行（01988）及交行（03328）升幅均逾2%。查實內銀股氣氛改善，主要係上周A股內銀股明顯見到有資金流入，但係咪本土「維穩」資金奉命掃貨，抑或真係有新錢流入吸納內銀股，就要多觀察一個禮拜先可下定論。同日阿莊推介嘅晨訊科技（02000）果然係有料到，股價升9.8%，收報1.68元，若短線回吐守1.66元應該仲有得再去！

洗頭水股霸王（01338）發出盈警，預期去年度會錄得不超過1.3億元人民幣虧損，雖然年內銷售表現受二噁烷事件影響早已喺市場預期之內，但似乎情況比預期差。未知是否早前已累積頗大跌幅，上周五霸王股價不跌反升，收報2.21元，升4.25%，但阿莊認為，喺管理層就扭轉銷售頹勢提出良方前，博反彈宜見好識收。

盈利表現突飛猛進

億和控股（00838）上月下旬發出盈喜，預期去年純利按年增幅將不少於八倍，主要受惠辦公室自動化設備、消費電子及汽車行業嘅客戶定單錄得強勁增長，加上去年下半年公司完成生產一款新辦公室自動化產品有關嘅金屬和塑膠模具，致使去年下半年來自該類業務嘅收入錄得顯著增長，另整體利潤率亦持續改善，以及受惠去年起獲得內地高新技術稅務優惠，令稅務開支有所下降。

億和前年度純利為3,151.9萬元，以此推算，估計去年度純利將超過2.5億元。以上周五收市價計，一○年預測市盈率約二十二倍，而一一年預測市盈率將降至二十倍樓下。事實上，億和從事嘅辦公室自動化產品，入門行檻亦較高，由公司長期接到要求嚴格嘅日本客戶定單，足見億和嘅實力獲得肯定，故見前年全球營商環境動盪，工業股普遍業績見紅，但公司仍能維持一定盈利，去年業績更大翻身！

去年開始，公司涉足汽車零件等高增長行業，難怪股價重獲基金垂青，上周五便傳來公司透過里昂證券配股集資2.95億元，每股作價6.25元。截至去年底止，億和尚處於淨現金狀況，照計並沒有配股集資需要。

但細看配股通告指，集資所得擬用作撥付持續業務拓展及潛在收購項目。既然業績理想，且可憧憬新收購，不妨睇位跟基金們走一轉，目標闖8元關，6元止蝕。

戰報

山水水泥（00691）

積奇上月二十五日推介山水水泥，當時低位5.42元，上周五最高升至6.1元，跟到足最多可賺逾12%。

暢豐車橋（01039）

暢豐車橋由低位抽升，錢進上周三已經吼中，當日低位4.05元，至上周五升抵4.58元高位，賺逾13%。