Fundman睇市：中芯復甦概念可憧憬

踏入兔年短短兩星期，蠱惑的兔仔真係捉弄了唔少魚缸中人，單係恒指在兩星期內就先跌近千五點，再反彈超過八百點，唔少股友可能已經嚇到要食驚風散。上周初，內地公布一月份通脹，意外地遠低過分析員預期的5.4%，僅得4.9%，雖然官方計算通脹的權重有所變動，市場一度認為官方整色整水粉飾太平，但姑勿論數字係真係假，股市表現反映市場已經預期通脹短期未肯回落的事實，中港兩地股市在數據後回升，恒指上周五升293點，報23,595點，一周累積升766點。

上周五傍晚人行加存款準備金率0.5%，去到19.5%的歷史新高，人行真係識揀時間，大行賓架放晒工至出招，到底今次「抽根」對後市有幾大影響，周日晚執筆時未見有任何大行評論，單睇上周三至五升成咁，斷估今日回番一、二百點，一啲都唔叫人意外。

令唔少股民失望的世界第四大晶圓生產商中芯國際（00981），第四季業績賺6,869萬美元，連同首三季累積盈餘，中芯好大機會自○四年後，第一次全年業績唔使見紅。業績勝預期的刺激，令中芯股價上周一度升至0.75元見今年新高，周五收報0.7元，埋單計數整個星期倒跌0.02元，主要係業績的同時，管理層對首季淨利潤和毛利率，作出可能下滑的預測。

中芯○四年以招股價2.69元上市，首年獲利之後，一直流血，股價無段好睇，幾年間訟訴不絕，公司也多次向股東伸手集資，應付半導體高資本投入的擴充競賽，嚇怕唔少捧場客，要搵唔買中芯的理由，相信很輕易找到一大堆，但如果手上有蝕本貨，筆者認為也不妨等等，因壞消息早在疲弱的股價上反映，但種種迹象顯示，中芯經營環境的確有所改善，例如佔中芯四成以上產品銷售的無線通訊設備芯片，在內地3G硬件市場高速發展下，相信會抵銷個人電腦及電子消費品定單，今年可能停滯不前的預期。

新管理層推動變革

此外，較概念性嘅因素，仲有中芯多年來和晶片界巨人，台灣台積電的知識產權糾紛去年正式解決，賠償條款使台積電從競爭對手變成手揸8%股權的第三大股東，而創始人張汝京黯然下台，亦催化一直主攻代工，愈做愈蝕的中芯邁向變革。

中芯市帳率目前大約為0.88倍，比台灣對手平均的1至1.1倍低，長期被睇低的中芯可唔可以趁業績復甦預期，整固後再發力？總結幾項因素，筆者認為機會都唔細。