短炒倉:英皇鐘錶 大成交突破
七連升之後,港股尋日迎來兩連跌,不過志強早前推介過嘅英皇鐘錶(00887)就逆市升2.6%,收報1.18元。
講到呢隻股,志強真係要「沙個冧」,事關上月三日推介時股價喺1.2元樓上,但之後就跌到1元才見底,不過志強認為,當日推介時所持嘅理據,包括零售市道興旺、業績表現樂觀等,其實至今並無任何改變。何況大股東楊受成上月至今,頻頻出手增持,最新一次是一月四日,買入200萬股。股聖彼德林治嘅名言話齋,大股東沽貨可以有好多理由,但買貨原因只得一個,就係睇好。
睇番英皇鐘錶去年中期盈利大升92.2%,至9,827萬元,而截至去年底嘅下半年度,由於有「十一」同聖誕新年旺季包括在內,業績表現自然更值得憧憬,在三月公布全年業績之前,話唔定又會好似中期一樣發盈喜,志強決定博多一次,目標維持睇1.45元,止蝕1.05元。