市場徐想：對沖基金 東來覓食
據報道，華爾街大佬高盛炒房一哥、全球坐盤交易部主管施家文擬另起爐灶，喺香港成立對沖基金，初期料最少集資10億美元，呢個肯定係自金融海嘯以嚟，最大規模嘅新成立對沖基金。聽講呢隻基金約75%資本都會投資喺亞洲，而原本隸屬施家文旗下嘅高盛亞洲坐盤交易團隊就會齊齊過檔，一齊打造新基金。
今年開始，對沖基金紛紛喺亞洲「開檔」，主要係覷準區內特別係阿爺嘅經濟增長前景秀麗，加上區內部分國家稅率偏低，進駐區內搵銀絕對「有啖好食」。加上歐美喺金融海嘯後加強金融業監管，嚴查對沖基金內幕交易，亦係另一個誘發業界東移到亞洲覓食嘅原因。
對沖基金嘅投資模式好多元化，主要靠策略性操作，喺全球市場隨時搵獲利機會，風險同回報冇「既定」準則，有啲對沖基金跑贏大市，但有啲就虧本，有啲提供穩定回報，所以各位粉絲喺投資對沖基金之前，都係清楚了解本身嘅投資需要為上策。