Fundman睇市：經營壓力減 聯通博得過

本地九月份零售銷售按年升17.2%，稍高於八月的17.1%，亦勝過市場原先估計的16.5%。花旗指訪港旅客持續增加，帶動九月電子及貴價消費品等銷售按年勁升32.9%；展望上海世博曲終人散，而廣州亞運揭幕在即，有望吸引更多旅客順道遊港，帶動零售市道。睇情況，香港的零售股近月雖然炒到出煙，但當年底更強勁的數據出籠時，可能先至到戲肉。

周一急升超過500點之後，港股高位缺乏方向，尋日埋單升18點，報23,671點，全日波幅158點，成交縮到得762億元。美國議息加埋QE2出台前夕，尋日澳洲、印度都學祖國一樣，來個突然加息，樂觀睇，港股唔趁機插水經已好叻，另一角度睇，美國準備開機狂印銀紙，各國政府看來都做足準備，以迎接鈔票洪流來犯，故先後提高息口留住熱錢，以減低資產泡沫的殺傷力。

今日政府拍賣九龍塘延文禮士道地皮，之前兩幅義德道地皮，呎價創九龍區新高。市場預期，今日競投氣氛亦會相當熱烈，測量師行估最後拍板價會比勾地價高30%至一倍。不過，瑞信報告估得十分保守，預測最後成交呎價9,052元，僅較勾出價7,542元高20%。該行係考慮咗同區二手樓呎價，加埋低密度住宅平均35%的合理毛利，最重要嘅係，特區政府新訂的一成發水上限，推算出較低的成交價。

限制發水影響揭盅

政府限制發水，其影響在今次的賣地會上應該見真章。不過，如果最後係同區有樓賣緊嘅華懋或者信置（00083）舉牌，看官們大可當一次賣樓宣傳算了，指標作用要減半。

股市係投票機器，股份表現落後，通常反映市場大多數人的睇法。九月份恒指由21,000點升到今日23,000樓上，但幾隻中資電訊股猶如老僧入定，完全無視升勢，何解？早前公布的第三季度業績，話畀大家聽答案。

新進3G經營者聯通（00762），首三季純利32.68億元（人民幣．下同），比去年倒退65%，單計第三季則賺7.42億元，甚至跌出大行估計9.4億元至18.8億元嘅下限，同首兩季盈利11.29億及13.97億元相比，也相形見絀。這主要歸咎於3G上半年上客未如理想，公司擴大手機補貼，由首兩季合共的11.7億元，增加到第三季單季的18.2億元。換句話說，第三季每個月補貼額平均達6.06億元，比五、六月份的3.4億及4.4億，又再加大，儘管對比聯通一季營業額接近430億，補貼僅佔收入4.3%，可是對純利率得2至3%的生意來說，這種貼手機吸客的模式，絕對攞命。見識過十年前香港六間流動電話服務供應商割喉競爭的日子，筆者相信這不可能是電訊商長期的經營之道。

3G上客目標已達

或許值得安慰的，是九月底3G上客量已去到1,055萬，提早達成管理層1,000萬的年終目標，意味着第四季「用錢買客」的做法可稍為收斂，令全年盤數不至太過難睇，餘下時間，股價壓力亦可減輕點。

聯通年初至今升7%，跑輸大市1%左右，基於3G處於投資及折舊高峰期，拿今、明兩年市盈率44.9倍及28.8倍來衡量抵唔抵買，意義唔大，以市帳率計，一○年底大約為1.06倍，同五年歷史的0.69至2.74倍相比（前者是金融海嘯時錄得，平均大約1.47倍），向下空間應該十分有限。筆者估計。第四季補貼額有可能回落，11元左右值得投機性買入。