為啖氣買巴郡股神呻蠢
「股神」巴菲特係投資界萬人景仰嘅大師，但佢接受財經頻道CNBC訪問時，自爆投資生涯最愚蠢嘅決定，竟然係巴郡！呢個說法令太子吃了一驚，巴郡依家每股價值超過12萬美元，好多人都希望喺自己嘅投資組合中有巴郡呢隻股份。巴菲特自爆，話喺一九六四年，因意氣用事而買入巴郡，亦即係股神依家嘅投資旗艦。股神話，如果當年收購嘅係一家保險公司，巴郡嘅市值可能較現時多2,000億美元。
壓價回購激嬲股神
話說股神當年睇準巴郡管理層一邊出售資產一邊回購股份，股神就想平價買入股份再轉售給巴郡管理層「撈一筆」，當佢同巴郡管理層斯坦頓協議以每股11.5美元，出售手持股份畀巴郡，呢班管理層竟耍花招，在出售通告上將作價壓至每股11.375美元，令股神非常激氣，於是狂掃巴郡股份，取得控制權後再怒炒斯坦頓洩憤。為啖氣嘅股神，終耗上足足二十年時間才能擺脫紡織業務。
巴菲特無非想告誡世人，以合理價買優質資產，好過以平價買爛資產，又話做生意毋須向高難度挑戰。
巴菲特話巴郡係佢一生最愚蠢嘅投資決定。 【設計圖片】