尋日本來預咗港股低開，但跌勢遠較預期溫和，多得內地股市做好。不過，穆迪調低愛爾蘭評級，以致港股未能跟隨內地股市回升，但由於歐元未見大插，相信恒指仍可守住2萬關。
二、三線股仔作個別發展，志強尋日吼東岳（00189），可惜隨大市走低，重返10日、20日及50日線之下，都係睇多兩日再作打算。今日吼恒芯中國（08046），咪睇小恒芯呢隻創板股，其實集三網合一、物聯網、3G、軍工、醫療、手機支付及家電下鄉等多種概念於一身，預期一○年及一一年每股盈利可達0.15至0.18元，難怪有條件申請轉主板。以集團一○年預測市盈率十倍計算，股價更可見1.5元，較現價幾乎再翻一番。
恒芯既然咁抵買，點解股價未能重返年內高位？主因係由於集團尚有2.64億元可換股票據未行使，而行使價更低至每股0.34元，故一旦行使，定必令股價大幅波動，同時會產生攤薄效應，所以志強認為，只要其CB未行使，恒芯都係只宜短炒，先睇50日線0.88元為首個目標，升穿後又能企穩的話，下一站睇1元，跌穿0.7元止蝕。