美股上周五急挫200幾點，本來預咗尋日期指要開於19,800至19,900點區域，但結果只係開低187點，報19,998點，跌幅唔夠1%，而且十時十五分前，經已重返20,000點樓上，勢頭之強，相信唔少揸咗重貨過周末嘅投資者，都會慶幸輸得少。

之不過，到午市A股強力抽升，港股不但未有跟隨，反而藉穆迪調低愛爾蘭政府債券評級的消息，在外圍普遍做好的情況下回軟，見過20,120點全日高位後，三時半居然可以再穿20,000點。無論做好做淡，恐怕雙方都不容易判斷尋日市況，到底是強是弱。

設定止蝕提早入市

從歐元在愛爾蘭被降級後先跌後急升，歐股早段走勢亦無大礙，美股恐慌指數VIX也變動唔大，今浪帶頭跌的港股，似乎對外圍的不利消息，有杞人憂天之嫌。筆者之前一直表示，想等待大市測試19,700點支持後才決定入市，不過尋日決定提早入市，大前提是期指收市要守得住19,930點，否則會作止蝕，上望的首個目標是20,370點，若能升穿，下一目標是20,450點。