港股升浪有餘未盡
昨日港股表現堅挺，一來農行（01288）效應未過，內銀股跌唔落；其次係歐債危機似乎市場已唔當「一回事」，歐元兌美元即市跌幅唔夠100點子，「歐豬」國家違約風險溢價（CDS）波幅唔大，至少比今年五六月時低，或大市見不利消息破壞力有限，淡友索性作壁上觀，種種條件看來，今次升浪應有餘未盡。
中央政府對經濟發展的可持續性愈來愈重視，環保意識抬頭，紫金（02899）旗下紫金山銅礦濕法廠污水池發生滲漏，令含銅染污物流入汀江，紫金山銅礦堆場被勒令停產。紫金復牌股價跌0.68元，報4.9元，去到年半新低。
紫金山銅礦停產，對全年產量及盈利有幾大影響？罰款幾多？證券行認為對估值只係幾個巴仙，不過，以其往績市盈率17.6倍，或者重估後的市帳率1.7倍計，仲係比海外其他金礦股高一至兩成，想博反彈，可以等多一陣。
航運股唔蝕已偷笑
中海集運（02866）發盈喜，估計一○年上半年業績會扭虧為盈。睇番往績，受金融海嘯拖累，中集運○九年上下半年，分別狂蝕34.17億及30.71億元（人民幣．下同），破晒紀錄，比較基數太差，按年或者比對去年下半年好轉，是意料之內，不過尋日股價都威咗半日，上午見過2.99元，升0.08元，只係最後倒跌0.04元，見2.87元收市。
市場先興奮後失望的反應，其實都幾合情合理，美國次按爆煲之後，又爆出個「歐豬」危機，祖國堂堂出口大國，商務部經已不止一次出來表示對歐洲出口貿易感到憂慮。睇番反映環球海運乾貨景氣的波羅的海指數，高峰期見過11,793點，去年最叻彈到上4,600點，最近又碌番落嚟，目前在1,840點水平，運費只係高位六分之一咁上下，航運股唔使蝕已偷笑，又可以威得去邊？
綜合大行的估計，中集運今年賺3.76億元，出年會再好啲，上番去18.5億元，市盈率十六倍。可是睇番中集運往績，自○五年開始，分別係賺35.8億、賺8.6億、賺32.3億、賺4,700萬、蝕64.9億，即使唔計最差的○九年，其盈利的波動性太大，四年平均賺19.3億元，如果是十至十二倍還可以接受，但在市場存在大量抵買股票的情況下，珼時股價已充分反映行業復甦的中集運，吸引力只係一般。