港股昨日亦牛皮偏軟，恒指喺20,500點水平受阻，收市報20,431點，跌36點，幸好大市成交回落至472億元，暫可看成短線調整。
紫金勿手多博反彈
紫金礦業（02899）昨日復牌，通告披露旗下銅礦污水滲漏影響生產，管理層亦對外承認洩漏事故暴露生產管理不足。受相關消息打擊，復牌後股價捱沽，曾低見4.83元，收報4.9元，跌12.18%，成交高達10億元，反映喺未能準確判斷事故賠償以及對生產嘅影響為時多久之下，投資者寧可先行止蝕離場。
其實，早喺六月中已有內地傳媒率先披露有關事故，有留意消息嘅投資者應該有充裕時間「逃生」。由於昨日復牌後股價沽壓沉重，睇怕冇咁快可以翻到身，若未及跳車者，宜果斷行事，炒家想博反彈則宜另作他選。
核心業務發展加快
回說本地個股，昨見持倉中嘅田生集團（08136）股價異動，高位曾見0.64元，收市報0.62元，升5%，成交1,977萬元。查實呢隻股喺0.5元水平已經橫行咗半年，依公司業務發展進度，股價向上突破係遲早問題。
阿莊之所以咁有信心，係見到自四月初立法會通過樓齡逾五十年樓宇強拍門檻下降至八成後，田生嘅收購舊樓代理業務明顯加快，喺舊區隨處可見田生參與嘅項目，早前管理層便向傳媒透露，上半年所落實嘅收購合約數目已超過去年全年數字，總值達到100億元，相信今年核心業務將呈大幅增長。
此外，公司早前表示，成立合營參與發展九龍城嘅重建項目，即係話要將業務擴展至毛利率較可觀嘅地產發展業務，這有助確保長線收益來源，亦有利於提升估值水平。
誠如阿莊早前所講，田生已具轉板條件，相信第三季宣布嘅年度業績將報佳音。由於拓展地產發展項目需要投入較多嘅資金，不排除喺宣布年度業績前後，股價炒高以便好消息公布後伸手集資，而事實上，橫睇豎睇，其基本因素良好，估值並未反映發展潛力，現價值博率高，可以坐定定等收成。
另外，阿莊話會睇位跟進億和控股（00838），昨日遂以平均價3.82元買入20萬股，該股全日高位見4元，收報3.99元，升7.5%，成交3,083萬元，目標上望4.5元。
戰報
波司登（03998）
史提芬上周五推介羽絨股波司登，當日低位2.13元，昨日逆市做好，高見2.35元，累積升幅10%。
+10%
金蝶國際（00268）
積奇本月八日推介軟件股金蝶國際，昨日股價創出3.51元的一年新高，較推介當日低位3.1元，升13%。
+13%