康宏理財終於「起錨」，真係替「黃主席」同「智慧陳」感到高興。我同呢間公司已經合作咗好多次，最深刻係為佢哋開班教授結構性產品解碼，講真當時都好鬼驚，因為「康記」班大帝全部都係「行業精英」，極度Demanding，教得唔好，一個唔好彩就「身敗名裂，體無完膚」，好彩大步檻過，亦都成為一個極好評價嘅講者。
當時夠膽推動呢件事係「黃主席」，佢前瞻性極高，全靠佢大膽推行先可以將新元素引入「康記」！「智慧陳」係另一個我認識嘅「康記」大頭，人如其名，佢對保險、MPF市場嘅認識認第二，無人敢認第一，同佢吹水，都係同佢講「炒嘢」，驚講保險唔夠佢嚟，「攻其弱，避其鋒」，我最精。
如果你睇好「康記」，即係你睇好佢哋班管理層，「踏着別人嘅足迹，不留自己嘅腳印」，又睇吓「康記」上市後，有乜新招推出，為投資者提供超值回報。