繼上海、南京、杭州等地嘅銀行放鬆第三套房貸後，昨日內地盛傳，深圳、北京部分銀行亦已靜靜雞放鬆第三套房貸款，消息刺激內房股表現。昨日A股市場中，六成內房股升幅超過半成，在港上市嘅內房股股價亦普遍高收。
講到內房股，近年大力拓展上海房地產業務嘅上海實業（00363），應該係上述消息嘅受益股份。最近大摩亦就上實發表報告，維持給予「增持」評級，並指即使未來一年內地樓價下跌兩成，上實經調整資產淨值為每股52.9元，即現價較之折讓幅度達37.8%，新訂目標價為46元。
阿莊亦唔只一次推介上實，對上一次係五月，建議喺30元樓下可以人棄我取，雖然現價已較當時嘅低位反彈15%，但阿莊相信，有心唔怕遲。事實上，呢個世界冇先知，難以估計何處是底，較務實嘅做法，係分注行事，相信中長線可讓股東財息兼收。
又有一隻新股掛牌，齊合天地（00976）首日上市高位做2.52元，收市報2.39元，較招股價2.43元低1.6%。雖然近期掛牌嘅新股，唔少都「潛水」，認購者要損手，但若然掛牌後先至參與，股價波幅亦唔係完全冇得炒，好似隻超威動力（00951），上周三首日掛牌股價曾低見1.89元，但其後股價回穩，昨日更重上水面（招股價2.18元），收市報2.2元，升9.45%。
億和留意上車機會
此外，工業股億和（00838）宣布配售1億股股份，其中8,000萬股係新股，餘下則屬大股東配售舊股，兩者作價同為每股3.6元，公司將集資約2.76億元。早前億和主動披露獲客戶同意於未來四年給予總額36億元嘅定單，並預計今年上半年嘅純利將較去年同期有不少於七倍嘅增長，相信中期業績公布後，可以加強投資者對公司業務全面復甦嘅信心，阿莊亦正留意上車機會。
回說阿莊投資組合，要沽嘅第二季已處理完畢，尚持有嘅會以一動不如一靜嘅態度來看待。
目前市況反反覆覆，尚未有好明確嘅方向，但阿莊參考美匯指數變化，有迹象顯示資金正從美元流出，若然呢個睇法沒有錯，不排除大量資金正逐步流入新興市場。近期市況反覆，可能在掩飾資金部署，呢一刻投資者最重要係保留實力，耐心等候，一旦大方向出現，就要全力以赴。
戰報
中國建材（03323）
上周二史提芬推介中建材，股價昨日高見13.34元，較推介當日低位11.84元，升12.6%。
首創置業（02868）
錢進本月七日推介的首創置業，當日低位2.15元，昨日最高升上2.47元，累積升幅14.8%。